У студзені—ліпені ў Мінску зарэгістравана 460 выпадкаў ВІЧ-інфекцыі, паказчык захворвання склаў 21,9 выпадку на 100 тыс. насельніцтва, паведамляе гарадскі цэнтр гігіены, эпідэміялогіі і грамадскага здароўя.
За ўвесь 2014 год у сталіцы было зарэгістравана 387 выпадкаў ВІЧ. З 1987 года сярод насельніцтва Мінска зарэгістравана 3.102 выпадкі ВІЧ-інфекцыі, з іх 1.100 (35,5%) — у жанчын.
На 1 жніўня ў горадзе пражывалі 2.663 чалавекі з ВІЧ-станоўчым статусам. Паказчык распаўсюджанасці інфекцыі складае 0,14% агульнай колькасці насельніцтва. Найбольшая колькасць ВІЧ-пазітыўных людзей пражывае на тэрыторыі Заводскага (20,7%) і Фрунзенскага раёнаў (19,6%).
За сем месяцаў гэтага года 75% усіх выпадкаў інфіцыравання былі звязаныя з ін'екцыйным увядзеннем наркотыкаў. На долю палавога шляху прыпала 20,4% выпадкаў, вертыкальнай перадачы ВІЧ ад маці дзіцяці — 0,7%.
За 28-гадовы статыстычны перыяд назірання ў структуры асноўных спосабаў інфіцыравання ўдзельная вага палавога шляху перадачы склала 39,6%, на долю немедыцынскага ін'екцыйнага ўвядзення наркатычных рэчываў прыпала 53%, перадача ВІЧ-інфекцыі ад маці дзіцяці адбывалася ў 1% выпадкаў, у 1,5% пацыентаў шлях перадачы не ўстаноўлены.
З 1987 года па 1 жніўня 2015 года ад ВІЧ-інфіцыраваных маці нарадзілася 429 дзяцей. Дыягназ «ВІЧ-інфекцыя» пацверджаны 30 дзецям ва ўзросце ад 0 да 14 гадоў, у чацвярых з іх дыягнаставаны СНІД, адно дзіця памерла.
У 98% выпадкаў пры выкананні ВІЧ-станоўчай цяжарнай жанчынай усіх прафілактычных і лячэбных мерапрыемстваў нараджаюцца здаровыя дзеці. Перадача вірусу ад маці дзіцяці адбываецца ў выпадку невыканання рэкамендацый урача, у тым ліку адмовы ад прыёму антырэтравірусных прэпаратаў.
Па розных прычынах за 28-гадовы перыяд памерла 439 пацыентаў з ВІЧ. За гэты час зарэгістравана 359 выпадкаў СНІДу. У стадыі СНІД памерла 180 чалавек.
Каментары