Дэпутаты Палаты прадстаўнікоў на пасяджэнні 19 лістапада прынялі ў другім чытанні папраўкі ў закон «Аб грамадзянстве Рэспублікі Беларусь».
Паводле слоў намесніка старшыні парламенцкай камісіі па правах чалавека, нацыянальных адносінах і сродках масавай інфармацыі Тамары Красоўскай, законапраект скіраваны на далейшае ўдасканаленне прававога рэгулявання інстытута грамадзянства Беларусі.
Дакумент канкрэтызуе паняцце бесперапыннасці тэрміну пастаяннага пражывання замежных грамадзян і асоб без грамадзянства непасрэдна да звароту з заявай аб прыёме ў грамадзянства Рэспублікі Беларусь. Гэта дазволіць устараніць наяўныя супярэчнасці пры вызначэнні бесперапыннасці пражывання замежных грамадзян на тэрыторыі Беларусі.
Законапраект пашырае правы атрымання грамадзянства ў спрошчаным парадку. Так, выключаецца неабходнасць патрабавання абавязковага знаходжання ў грамадзянстве былога СССР асоб, якія набываюць грамадзянства Рэспублікі Беларусь у парадку рэгістрацыі.
Таксама дакумент канкрэтызуе парадак атрымання беларускага грамадзянства па нараджэнні. У прыватнасці, уводзіцца падстава прадастаўлення грамадзянства Рэспублікі Беларусь дзіцяці, якое нарадзілася на тэрыторыі Рэспублікі Беларусь, а бацькі якога часова пражываюць у ёй і з'яўляюцца асобамі без грамадзянства.
Акрамя таго, замацоўваецца палажэнне аб набыцці грамадзянства дзецьмі, у дачыненні да якіх устаноўлена бацькоўства або мацярынства адным з бацькоў — грамадзянінам Рэспублікі Беларусь.
Цяпер чытаюць
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары