Аргкамітэт кангрэса дэмсілаў заклікаў далучыцца да ўдзелу ўсе дэмакратычныя арганізацыі Беларусі
Аргкамітэт па правядзенні кангрэса дэмакратычных сіл 29 студзеня заклікаў далучыцца да правядзення мерапрыемства тыя арганізацыі Беларусі, якія бачаць краіну «незалежнай, дэмакратычнай і еўрапейскай».
«Эканамічная і палітычная сітуацыя ўнутры і вакол Беларусі вельмі небяспечная. Яна пагражае не толькі нашай незалежнасці, а ўвогуле існаванню краіны, нясе пагрозу не толькі дабрабыту, але і мірнаму жыццю нашых грамадзян», — гаворыцца ў распаўсюджаным сёння звароце.
На думку аргкамітэта, сёння «ні ад кіраўніка дзяржавы, ні ад яго ўрада няма прапаноў па выхадзе з эканамічнага крызісу, з палітычнага тупіка. Між тым узровень жыцця катастрафічна зніжаецца, пагроза знешняга ўмяшання расце. У такіх варунках прапанаваць грамадству шлях да выратавання краіны, узяць на сябе адказнасць за будучыню Беларусі мусіць дэмакратычная супольнасць», — падкрэсліваецца ў звароце.
«Час вымагае сумесных дзеянняў. Заклікаем усе партыі, рухі, арганізацыі, усіх грамадзян, якім баліць сэрца за Айчыну, якія бачаць будучую Беларусь незалежнай, дэмакратычнай, еўрапейскай краінай, далучыцца да падрыхтоўкі і правядзення кангрэса дэмакратычных сіл!» — заяўляюць члены аргкамітэта.
Нагадаем, правядзенне кангрэса дэмсіл з мэтай кансалідацыі апазіцыі ініцыявала 17 снежня група вядомых грамадскіх дзеячаў Беларусі. На наступны дзень Мікалай Статкевіч, Уладзімір Някляеў і Станіслаў Шушкевіч абвясцілі аб стварэнні аргкамітэта па падрыхтоўцы кангрэса. Зараз апроч названых палітыкаў у склад аргкамітэта ўваходзяць Дзмітрый Дашкевіч, Вячаслаў Сіўчык, Андрэй Саннікаў, Генадзь Фядыніч і Міхаіл Пастухоў.
30 студзеня ў Мінску адбудзецца пасяджэнне сойма Партыі БНФ, на якім плануецца разгледзець пытанне магчымага ўдзелу ў аргкамітэце па правядзенні кангрэса дэмакратычных сіл.
Каментары