Адна з лідараў кампаніі «Гавары праўду» Таццяна Караткевіч 10 лютага ў Мінску абмеркавала з палітычным дырэктарам МЗС Германіі Андрэасам Міхаэлісам сітуацыю ў Беларусі.
Планавалася, што на сустрэчы будзе прысутнічаць кандыдат у прэзідэнты на выбарах 2010 года былы палітвязень Мікалай Статкевіч. Аднак, паводле слоў палітыка, ён вымушаны быў адмовіцца ад сустрэчы з-за дрэннага самаадчування.
Як паведаміла Караткевіч, з Міхаэлісам абмяркоўваліся тэмы развіцця адносін краін ЕС і Беларусі. «Я расказала пра наша бачанне міжнароднай палітыкі Беларусі і ЕС. Згодна з нашай канцэпцыяй, у найбліжэйшыя 10 гадоў трэба развіваць і ўмацоўваць рэгіянальнае супрацоўніцтва, якое прынясе нашай краіне інвестыцыі, новыя тэхналогіі і бяспеку. Канцэпцыя прадугледжвае імкненне Беларусі да нейтралітэту, заключэнне базавага дагавора з ЕС, шчыльнае супрацоўніцтва з краінамі Вышаградскай групы, а таксама ўзмацненне эканамічнага супрацоўніцтва з Украінай і Польшчай», — сказала яна.
На сустрэчы таксама абмяркоўвалася пытанне санкцый у дачыненні да беларускіх чыноўнікаў. «Наша пазіцыя — санкцыі трэба здымаць абумоўлена. Рэформы, на якія пойдзе ўлада, павінны быць незваротныя, тычыцца інтарэсаў грамадзян, даваць новыя магчымасці для развіцця краіны. У палітычным плане рэформы павінны даць больш правоў і свабод грамадзянам. І гэтыя змены павінны быць стабільнымі», — адзначыла Караткевіч.
Паводле яе слоў, сустрэча доўжылася прыблізна гадзіну. Прадстаўнік МЗС Германіі, адзначыла Караткевіч, разглядае санкцыі «як механізм, а не канчатковую мэту». «Германія зацікаўленая развіваць супрацоўніцтва паміж нашымі краінамі», — сказала яна.
Акрамя таго, паведаміла Караткевіч, была закранутая тэма захавання правоў чалавека ў Беларусі. «Улады Беларусі і ЕС вядуць пэўны дыялог у гэтым кірунку. Мы лічым, што прадстаўнікі грамадзянскай супольнасці павінны быць ўцягнутыя ў гэты дыялог», — падкрэсліла яна.
Цяпер чытаюць
Асудзілі мазырскага блогера Union Bell. Хлопец некалькі гадоў хаваўся, але пасля арышту бацькі быў вымушаны звярнуцца ў бальніцу8
Асудзілі мазырскага блогера Union Bell. Хлопец некалькі гадоў хаваўся, але пасля арышту бацькі быў вымушаны звярнуцца ў бальніцу
«Я супраць. Мовы, якія пакінулі пасля сябе каланізатары ў Афрыцы, сталі шляхам да цывілізацыі». Алексіевіч адказала, як ставіцца да адмовы ад рускай мовы ва Украіне8888
Каментары