Прэзыдэнт РФ Уладзімір Пуцін у вельмі вострых выразах выказаўся пра зрыў ранішняга запуску ракеты-носьбіта «Саюз-2.1а» з новазбудаванага касмадрому «Ўсходні» ў Амурскай вобласці.
Ракета павінна была вывесьці на арбіту тры спадарожнікі: «Ламаносаў», «Бусел-2Д» і SamSat-218.
Запуск быў заплянаваны на 05:01 раніцы па маскоўскім часе 27 красавіка. Але за паўтары хвіліны да старту яго нечакана адклалі з-за збою сыстэмы кіраваньня. Крыніца ў ракетна-касьмічнай сфэры патлумачыла магчымую прычыну адмены запуску наступным чынам: «Папярэдне, магло мець месца аўтаматычнае спыненьне пускаў на этапе наддуву бакаў ракеты-носьбіта». Паводле яго слоў, магла паўстаць праблема з дрэнажнымі клапанамі.
Пасьля таго, як старт быў адкладзены, Пуцін сабраў пасяджэньне дзяржкамісіі па запуску ракеты-носьбіта і выказаў занепакоенасьць вялікай колькасьцю збояў пры касьмічных запусках у РФ у апошні час:
«Калі гэта (збоі) зьвязана з разгільдзяйствам, з недастатковым кантролем над важнымі працэсамі, я хачу зразумець, паглядзець, як ідзе разбор палётаў у такіх выпадках», — заявіў ён. «Вядома, трэба будзе рабіць высновы». «Расея застаецца лідэрам па колькасьці пускаў — гэта добра, але тое, што мы сутыкаемся зь вялікай колькасьцю збояў — гэта дрэнна і павінна быць своечасовая рэакцыя», — заявіў Пуцін.
Ён нагадаў пра нядаўнія збоі пускаў расейскіх ракет з касмадрому Куру ў Францускай Гвіяне. Толькі два з іх, паводле яго слоў, былі праз дрэннае надвор’е, а яшчэ два — празь неналежны стан апарата.
Паводле афіцыйнай вэрсіі, якая была агучана прэзыдэнту, у зрыве ўрачыстага запуску ракеты раніцай у сераду быў вінаваты «сам стартавы комплекс» «Усходняга».
Пуцін паабяцаў, што ня будзе ўмешвацца ў працу дзяржкамісіі, якая высьвятляе прычыны няўдалага запуску, але паабяцаў зноў наведаць касмадром, а таксама «турэмныя нары» тым будаўнікам «Усходняга», якія падазраюцца ў растратах і іншых злачынствах пры будаўніцтве касмадрому.
«Давялося распачаць шэсьць крымінальных спраў, чатыры чалавекі арыштавана, двое зь іх, праўда, знаходзяцца пад хатнім арыштам, а двое ў СІЗА сядзяць. Але калі віна тых, хто падазраецца ў правапарушэньнях, будзе даказаная, то ім прыйдзецца зьмяніць цёплы хатні ложак на турэмныя нары», — цытуе Інтэрфакс словы Пуціна на пасяджэньні дзяржкамісіі.
Віцэ-прэм’ер Расеі Дзьмітрый Рагозін нядаўна прызнаў, што ў ходзе будаўніцтва касмадрому былі дапушчаныя «сур’ёзныя фінансавыя парушэньні»:
«Я працаваў у камісіі. Была адкрыта 21 крымінальная справа. Затрыманыя 21 чалавек. Гэта і былое кіраўніцтва «Дальспецстроя» — спадар Юры Хрызман і ягоны сын. Яны вывелі грошы, якія павінны былі ісьці на касмадром, на будаўніцтва жыльля ў Хабараўску», — сказаў Рагозін.
Цяпер чытаюць
Пракуратура пра смерць Мелказёрава: журналіст меў хранічную хваробу13
Каментары