Пракуратура Мінска 16 чэрвеня санкцыянавала зняволенне пад варту кіроўцы 1986 года нараджэння, які трыма днямі раней здзейсніў ДТЗ на Партызанскім праспекце, у выніку якога адзін чалавек загінуў, а другі атрымаў цялесныя пашкоджанні і знаходзіцца ва ўстанове аховы здароўя.
Як паведаміла старшы памочнік пракурора горада Наталля Косач, кіроўца падазраецца ў здзяйсненні злачынства, прадугледжанага ч. 4 арт. 317 КК (парушэнне правілаў дарожнага руху асобай, якая кіравала транспартным сродкам у стане, выкліканым ужываннем наркатычных сродкаў, псіхатропных рэчываў, што пацягнула па неасцярожнасці смерць чалавека).
У момант ДТЗ пацярпелыя перасякалі праезную частку па рэгуляваным пешаходным пераходзе на дазваляльны сігнал святлафора. Пасля наезду на іх падазраваны здзейсніў сутыкненне з іншым аўтамабілем.
Санкцыя ч. 4 арт. 317 КК прадугледжвае прызначэнне асобе, якая ўчыніла такое злачынства, пакарання ў выглядзе пазбаўлення волі на тэрмін да сямі гадоў з пазбаўленнем права займаць пэўныя пасады або займацца пэўнай дзейнасцю. «Такое досыць суровае для неасцярожнага злачынства пакаранне абумоўлена як цяжарам наступстваў дадзенага злачынства, так і станам, у якім яно здзяйсняецца», — адзначыла прадстаўніца сталічнай пракуратуры.
Нагадаем, днём 13 чэрвеня кіроўца аўтамабіля «Фольксваген-Пасат», які рухаўся па Партызанскім праспекце з боку вуліцы Кабушкіна, на скрыжаванні з вуліцай Шашэйнай наехаў на рэгуляваным пешаходным пераходзе на мужчыну і маладога чалавека, пасля чаго сутыкнуўся з аўтамабілем «Хёндай». Пешаходы — мінчукі, дзядуля 1951 года нараджэння і ўнук 1997 нараджэння. Старэйшы мужчына загінуў.
Першапачаткова па факце ДТЗ была распачатая справа па ч. 2 арт. 317 КК.
14 чэрвеня следчыя органы паведамілі, што ў момант наезду на пешаходаў кіроўца знаходзіўся ў стане наркатычнага ап'янення. Таксама высветлілася, што ў пачатку чэрвеня бягучага года ён на адзін год быў пазбаўлены права кіравання транспартнымі сродкамі за перавышэнне хуткасці.
Пракуратура пра смерць Мелказёрава: журналіст меў хранічную хваробу17
Каментары