Знясіленага галадоўкай Уладзіміра Кондруся перавялі ў турэмны шпіталь
10 жніўня бацькі Уладзіміра Кондруся паведамілі праваабаронцам «Вясны», што іх сына перавялі ў рэспубліканскі турэмны шпіталь, які знаходзіцца на тэрыторыі СІЗА-1 на Валадарскага. Па словах доктара, яго ўдалося ўгаварыць на выхад з галадоўкі.
Пасля першага дазволенага спаткання з сынам, якога яны ўбачылі, з іх словаў, у стане напалову трупа, бацькі Уладзіміра Кондруся звярнуліся да дзяжурнага па СІЗА і ім удалося дамагчыся сустрэчы з доктарам з санчасткі. У выніку, учора ўвечары Уладзіміра перавялі ў рэспубліканскі турэмны шпіталь, які знаходзіцца на тэрыторыі СІЗА. Не выключана, што сваю ролю ў гэтым меў і шырокі інфармацыйны рэзананс пра цяжкі стан здароўя новага фігуранта справы аб масавых беспарадках.
Сёння бацькам удалося пагаварыць з доктарам турэмнай бальніцы, якая распавяла, што Уладзіміру ўжо ставілі кропельніцу і што яна пераканала яго спыніць галадоўку, таму папрасіла перадаць свайму пацыенту дзіцячае харчаванне. Медыкі таксама абяцаюць з часам зрабіць яму зонд, пра што Уладзімір папрасіў на ўчорашнім спатканні.
Паводле бацькоў, гэтая навіна дае ім некаторую надзею, паколькі яшчэ ўчора ў адказ на іх ўгаворы пачаць прымаць ежу Уладзімір адказаў, што не можа, паколькі арганізм ужо сам яе адхіляе.
Таксама бацькі Уладзіміра Кондруся паведамілі, што сёння наведалі следчага і пакінулі яму прашэнне пра змену меры стрымання да суда, каб паставіць сына на ногі. З іх слоў, у адказ на гэта следчы толькі падкрэсліў, што іх сын «здзейсніў цяжкае злачынства».
Нагадаем, што праваабарончыя арганізацыі Беларусі прызналі Уладзіміра Кондруся палітычным зняволеным. Як падкрэсліваецца ў адпаведнай заяве, дзеянні Уладзіміра Кондруся не могуць быць кваліфікаваныя па артыкуле 293 Крымінальнага кодэкса Рэспублікі Беларусь («Масавыя беспарадкі»), а тэрмін даўнасці па іншых артыкулах КК, па якіх яны маглі б быць кваліфікаваныя, мінуў.
Цяпер чытаюць
Беларуска арганізавала адпачынак для дзяцей палітвязняў на Лазурным беразе. Яна расказала, як уцякала з краіны і як яе затрымліваў Інтэрпал5
Каментары