Амерыканскія марпехі, жаўнеры Украіны і Латвіі навучацца адбіваць танкавыя атакі у Грузіі
Падраздзяленне Корпуса марской пяхоты ЗША разам з калегамі з пяці ўсходнееўрапейскіх краін пачнуць на гэтым тыдні вучэнні ў Грузіі, перадае сайт marinecorpstimes.com.
Выданне для марпехаў ЗША адзначае, што хоць афіцыйна праціўнік не называецца, але расійская армія выкарыстоўвае шмат бронетэхнікі, у тым ліку пастаўляла танкі T-72Б3 антыўкраінскім баевікам на Данбас.
У вучэннях, якія будуць працягвацца 13 дзён, возьмуць удзел, акрамя вайскоўцаў ЗША і Грузіі, таксама жаўнеры з Украіны, Латвіі, Румыніі і Балгарыі.
Падчас вучэнняў будуць выкарыстоўвацца танкі, іншая бронетэхніка, рэактыўныя супрацьтанкавыя комплексы і іншыя складаныя ўзоры ўзбраенняў, паведаміла камандаванне Корпуса марской пяхоты ў Еўропе.
Сумесны кантынгент будзе адбіваць «наступленне» танкаў праціўніка на грузінскі горад Ахалцыхэ, які знаходзіцца прыкладна ў 150 км ад Цхінвалі, сталіцы Паўднёвай Асетыі, фактычна анексаванай Расіяй у 2008 годзе.
Вучэнні Agile Spirit праводзяцца кожны год, аднак у гэтым годзе яны больш масавыя, і ў іх упершыню ўдзельнічаюць украінскія байцы.
Каментары