У Турцыі прапанавалі адмяніць «усё ўключана», каб турысты больш вандравалі па краіне
Кіраўнік канфедэрацыі гандляроў і рамеснікаў Турцыі (TESK) Бендэві Паландокен прапанаваў адмяніць сістэму «ўсё ўключана» для турэцкіх курортаў, паведамляе газета Sözcü.
На яго думку, турыстычны сектар павінен адыходзіць ад канцэпцыі гасцінічнага турызму. Паландокен лічыць, што з ліквідацыяй «усё ўключана» турысты пачнуць часцей наведваць славутасці і хадзіць па крамах.
Выданне адзначае, што часцей за ўсё паслугай «усё ўключана» любяць карыстацца расійскія і нямецкія турысты. У рамках гэтай сістэмы, тлумачыць Sözcü, турысты рэдка пакідаюць тэрыторыю гасцініцы, бо не хочуць прапусціць сняданак, абед ці вячэру.
У выніку ў большасці выпадкаў яны здзяйсняюць толькі дзве паездкі ўнутры Турцыі — з аэрапорта ў гатэль і назад.
Да 2023 года Турцыя разлічвае ўвайсці ў пяцёрку найлепшых у свеце кірункаў і прымаць каля 50 мільёнаў турыстаў у год. Аднак у экспертным асяродку не ўпэўненыя, што гэта магчыма пры захаванні сістэмы «усё ўключана».
Каментары