Пяць фактаў пра новага старшыню Белтэлерадыёкампаніі Івана Эйсманта

Генадзь Давыдзька больш не дырэктар Белтэлерадыёкампаніі. Цяпер найбуйнейшы медыйны холдынг краіны ўзначаліць 40-гадовы Іван Эйсмант. Хто гэта такі?

Муж прэс-сакратаркі Лукашэнкі

Павялічыць

Галоўны факт пра Эйсманта, які зацямняе ўсе астатнія — гэта тое, што ён муж Наталлі Эйсмант, прэс-сакратаркі Аляксандра Лукашэнкі. Пабраліся шлюбам яны ў верасні 2010 года.

На той момант і Іван, і Наталля працавалі вядучымі на БТ. Наталля (у дзявоцтве Сялюн, псеўданім на БТ — Кірсанава) вяла «Навіны рэгіёна», а Іван — «Зону Х». Сведкай на вяселлі была актрыса Купалаўскага Валянціна Гарцуева. Пярсцёнкі былі выкананыя з жоўтага і белага золата з алмазным напыленнем.

Гэта быў тыповы службовы раман. У 2006 годзе Наталля прыйшла працаваць у перадачу «Дзелавое жыццё», якую вёў Іван. А праз два гады пара пачала сустракацца. «У нейкім родзе я быў яе настаўнікам», — расказваў Іван.

У лістападзе 2014 года Аляксандр Лукашэнка прызначыў Наталлю Эйсмант сваім прэс-сакратаром. З таго часу яе называюць адной з найбольш уплывовых жанчын у кіраўніцтве краіны.

Дзяцей у пары няма.

Сястра таксама на БТ, брат — аграном

Павялічыць

Родам Іван Эйсмант з мястэчка Луцкаўляны Гродзенскага раёна. Гэта каталіцкі рэгіён, усяго за пяць кіламетраў ад польскай мяжы.

У сям’і было трое дзяцей. Старэйшы, Генадзь, стаў галоўным аграномам у СВК імя Дзеншчыкава, а дачка Ганна — вядучай спартыўных навін на БТ.

Бацька Міхаіл Андрэевіч працаваў кіроўцам у калгасе. Генадзь увесь час прападаў з бацькам на полі, таму і вырашыў стаць аграномам.

Маці Ганна Канстанцінаўна кажа, што сын з дзяцінства любіў чытаць газеты. Выразаў з іх нататкі пра спорт, а асабліва радаваўся, калі бачыў нешта пра Дыега Марадону.

Бацькі Эйсмантаў, якія разам ужо 49 гадоў, кажуць, што стараюцца не прапускаць ніводнага эфіру, дзе працуюць іх дзеці.

Восем гадоў праслужыў у міліцыі

Павялічыць

Па адукацыі Іван Эйсмант не журналіст. Ён скончыў юрыдычны факультэт Акадэміі міліцыі. Працаваў у Гродне па спецыяльнасці. Даслужыўся да капітана. Пра службу ў міліцыі кажа: «Гэта была добрая школа жыцця». У гэты час пісаў як пазаштатны аўтар у спартыўную газету «Прэсбол».

На тэлебачанне Іван трапіў дастаткова выпадкова. У 2006 годзе сястра Ганна, якая на той момант ужо працавала на БТ, запрасіла Івана паспрабаваць сілы ў кастынгу вядучых. Той узгадваў, што на кастынгу быў апрануты ў пінжак Дзяніса Кур’яна.

Паводле афіцыйный легенды, на тэлебачанні давялося ўзяць псеўданім, бо, маўляў, не дужа добра, калі вядучы навінаў Эйсмант перадае слова вядучай спартовых навін Эйсмант. У выніку тэлевядучы стаў Іванам Міхайлавым, што сугучна з ягоным імем па бацьку.

Мае медаль Францішка Скарыны

Павялічыць

На БТ Эйсмант вёў самыя розныя перадачы: «Дзелавое жыццё», «Сфера інтарэсаў», «Зона Х», «Навіны», «Панарама», «Галоўны эфір». Чым болей часу Эйсмант працаваў, тым далей па службе ён прасоўваўся.

Узначальваў Агенцтва тэлевізійных навін, а ў маі 2017 стаў намеснікам старшыні Белтэлерадыёкампаніі. Цяпер Эйсмант замяняе на пасадзе свайго папярэдняга кіраўніка Давыдзьку.

З памятных інтэрв’ю Іван Эйсмант успамінае гутарку з расійскім акцёрам Міхаілам Баярскім, якога атрымалася растапіць арыгінальнымі пытаннямі пра ягоны капялюш.

У студзені 2014 года Эйсмант атрымаў з рук Аляксандра Лукашэнкі медаль імя Францішка Скарыны. Тады ж медаль атрымалі спявачка Вікторыя Алешка і аглядальніца «СБ» Аэліта Сюльжына.

Галоўным сваім захапленнем Іван Эйсмант называе футбол. Прычым не толькі глядзіць, але і стараецца сам не забываць пра тое, як гуляць.

Заступаўся за Лукашэнку

Як вядучы «Галоўнага эфіру», Іван Эйсмант запомніўся тым, што хваліў гульню Аляксандра Лукашэнкі на Калядным хакейным турніры ў 2016 годзе.

«З 2005 года гляджу матчы каманды прэзідэнта і ніколі не бачыў, каб супернікі расступаліся перад прэзідэнтам», — запэўніваў Эйсмант.

«Ніколі не пішы вялікія артыкулы аб тым, у чым не разбіраешся», — раіў вядучы БТ журналісту tut.by Юрыю Міхалевічу, які пасмеў іранічна выказацца аб гульні Лукашэнкі.

***

На тэлеграм-канал «Нашай Нівы» можна падпісацца тут.

• 0
• 0
• 0
• 0
• 0
• 0
• 0
• 0