З'явілася ВІДЭА з рэакцыяй Ілана Маска на запуск Falcon Heavy: «Святы лятучы ***, гэтая штука ўзляцела!»
Сайт National Geographic апублікаваў эксклюзіўнае відэа, на якім кіраўнік SpaceX Ілан Маск разам з астатнімі супрацоўнікамі кампаніі назірае за стартам ракеты-носьбіта Falcon Heavy — самай магутнай з ракет, якія эксплуатуюцца цяпер, перадае newsru.com.
«Святы лятучы ***, гэтая штука ўзляцела!» — усклікае Маск, назіраючы за трансляцыяй запуску на экране ў цэнтры кіравання. Потым ён выбягае на вуліцу, каб назіраць за паспяховым узлётам унікальнай ракеты, здольнай падняць у космас 63,4 тоны грузу, што роўна вазе двух дарослых кашалотаў, адзначае National Geographic.
Як пазней прызнаваўся Маск, ні да, ні адразу пасля запуску ён не быў упэўнены ў яго поспеху.
Гістарычны пуск адбыўся 6 лютага з пляцоўкі LC-39A Касмічнага цэнтра Кенэдзі на мысе Канаверал у Флорыдзе. Запуск прайшоў паспяхова, хоць не абышлося без непрыемнасцяў пры пасадцы на ваду цэнтральнага разгоннага блока. Але ўдалося захаваць два дадатковыя паскаральнікі, якія здзейснілі паспяховую пасадку на наземных платформах.
7 лютага Маск паведаміў, што ракета выйшла за межы арбіты Зямлі і рухаецца ў бок пояса астэроідаў. Пры гэтым, мяркуючы па апублікаванай Маскам схеме, ракета адляціць ад Сонца далей, чым чакалася, і амаль дасягне арбіты карлікавай планеты Цэрэра.
Паводле разлікаў, калі ў выніку ракета выйдзе на правільную арбіту, то дзесьці ў кастрычніку яна тэарэтычна можа дасягнуць Марса. Але гэта будзе выпадковасць, бо тэхнічныя дадзеныя разганяючага блока Falcon Heavy не прадугледжваюць магчымасці выпраўлення траекторыі руху, адзначае Live Science.
Каментары