Былы супрацоўнік Адміністрацыі прэзідэнта Леў Крыштаповіч: Беларусь — гэта Расія
Заходнерусіст Леў Крыштаповіч, які доўгі час працаваў у Інфармацыйна-аналітычным цэнтры пры Адміністрацыі прэзідэнта, выступіў з артыкулам «Беларусь — гэта Расія са знакам якасці». Відавочна, што ў загалоўку перафармуляваная цытата Аляксандра Лукашэнкі, што «беларусы — гэта рускія са знакам якасці».
Крыштаповіч называе геапалітычнай «катастрофай» развал СССР. Беларусь і іншыя краіны, якія ўтварыліся ў выніку гэтага развалу, Крыштаповіч называе «абломкамі катастрофы». «Фактычна — гэта ўдзельныя княствы, якія аказаліся пад кіраваннем з боку Захаду».
На думку Крыштаповіча, сённяшняя «Саюзная дзяржава» Беларусі і Расіі сябе вычарпала і прыспеў час інтэгравацца больш глыбока. «Па-за рамкамі саюзнасці як беларуская, так і расійская дзяржаўнасць непаўнавартасная, «ушчэрбная», абцяжараная геапалітычнай катастрафічнасцю, дэзінтэграцыйная».
Навуковец бязлітасна крытыкуе Еўрасаюз, маўляў, ні ў якім разе туды ісці не варта. «Еўрасаюз у цяперашні час з'яўляецца выключна рэакцыйным, алігархічным утварэннем, якое дзейнічае ў рэчышчы стварэння аднапалярнага свету». Толькі ў аб’яданні з Расіяй Крыштаповіч бачыць «нацыянальную ідэю» беларусаў.
«Неабходна прызнаць, што ўвесь нерв беларускага жыцця звязаны з Расіяй. Ён звязаны з Расеяй не толькі эканамічна, але і ментальна, лёсавырашальна», — мяркуе заходнерусіст.
«Ва ўмовах антырасейскіх санкцый Рэспубліка Беларусь павінна быць яшчэ больш цесна звязана з Расіяй, бо калі не ўстаіць Расія, то абрынецца і Беларусь. Стабільнасць і развіццё Беларусі неаддзельныя ад стабільнасці і прагрэсу Расіі. Будучыня Беларусі і Расіі ў іх адзінстве. Такім чынам, незалежнасць і суверэнітэт Беларусі і Расіі магчымыя толькі ў адзінай Саюзнай дзяржаве», — перакананы доктар філасофскіх навук.
Далей Крыштаповіч, які прайшоў праз чынавенскія пасады кажа, што беларускія чыноўнікі ў асноўнай масе заўсёды арыентаваліся на Захад, на іх стандарты жыцця і дэмакратыі і «ніколі не верылі ў палітыку Аляксандра Лукашэнкі, ні ў беларускі шлях развіцця».
«Неабходна прызнаць Беларусь складовай часткай агульнарускай цывілізацыі. У свой час Аляксандр Лукашэнка ў афарыстычнай форме зусім правільна падкрэсліваў, што «беларус — гэта рускі са знакам якасці». Працягваючы гэтую думку, будзе лагічна сказаць, што «Беларусь — гэта Расея са знакам якасці». Неабходна адмовіцца ад пабудоў разнастайных антырасейскіх «Ельцын-цэнтраў» у Расеі і ўзнясення антыбеларускіх Радзівілаў, Агінскіх і іншых падобных персанажаў у Беларусі. Калі нам удасца гэта зрабіць, то будучыня ў Саюзнай дзяржавы ёсць», — перакананы Крыштаповіч.
Ад 2008 да 2014 года Леў Крыштаповіч з’яўляўся намеснікам у Інфармацыйна-аналітычным цэнтры пры Адміністрацыі прэзідэнта. Толькі з прыходам новага дырэктара Аляксея Дзербіна Крыштаповіч страціў сваю пасаду.
Доктару філасофскіх навук Льву Крыштаповічу 68 гадоў. Ён нарадзіўся ў вёсцы Пекалін Смалявіцкага раёна. Скончыў гістфак БДУ. Аўтар кніг: «Беларусь як руская святыня», «Беларусь і Расія: гістарыясофскае і цывілізацыйнае адзінства».
Цяпер з’яўляецца начальнікам навукова-даследчага аддзелу Беларускага дзяржаўнага ўніверсітэта культуры і мастацтваў.
Ціханоўскі расказаў, што трэба было рабіць у жніўні 2020-га62
Каментары