Галоўны ЛОР Гомельскай вобласці пракаментаваў сітуацыю з рэчыцкім «прышэльцам»
«Наша Ніва» пісала пра выпадак у Рэчыцы: у Рэдакцыю звярнуўся сябра рабочага Леаніда Сасноўскага, які сцвярджаў, што медыкі недагледзелі ў Леаніда гаймарыт, у выніку чаго ў таго гной раз'еў косці і храшчы, мужчына стаў кепска чуць, бачыць і гаварыць.
Толькі па настаянні сястры мужчына пайшоў да прыватных дактароў, якія ў жаху далі яму рэкамендацыю на хірургічнае ўмяшальніцтва, якое, праўда, ужо немагчыма было зрабіць.
«Тварам стаў як прышэлец»: у Рэчыцы медыкі недаглядзелі мужчыну з гаймарытам?
Спачатку дактары нічога не каментавалі, спасылаючыся на медыцынскую таямніцу.
Потым, калі гісторыя разышлася, з «Нашай Нівай» пагаварыў галоўны пазаштатны ЛОР Гомельскай вобласці Аляксандр Чарныш.
Ён кажа, што вінаваціць дактароў у гэтым выпадку няправільна, бо сітуацыя развівалася трохі іначай.
«Так, ад пачатку мужчына лячыўся не ў ЛОР-аддзяленні рэчыцкай бальніцы, гэта праўда. Але і гаймарыту ў яго не было, там ад самага пачатку была анкалогія. У яго бралі біяпсію, трэба было верыфікаваць дыягназ пасля гісталагічнага абследавання. Гэта не за адзін дзень робіцца, таму і магло скласціся ўражанне, што яго «не лячылі». Заўважу, што на паўторны агляд, калі былі гатовыя аналізы, ён не з'явіўся, а прыйшоў ужо з канкрэтнымі сімптомамі, калі ўсё гэта зацягнулася. У Гомелі ж канкрэтна ён быў ужо ў анкалагічным дыспансеры. Цяпер гэты мужчына знаходзіцца на лячэнні ў рэчыцкай бальніцы, усё неабходнае сімптаматычнае лячэнне яму аказваецца. Цяпер яго стан неблагі, хаця, канечне, пра вяртанне твару да нормы гаварыць не выпадае — гаворка пра тое, каб перамагчы тыя новаўтварэнні», — сказаў нам Чарныш.
Цяпер чытаюць
«Калі б не «Вясна-1996, мы б былі Татарстанам». 30 гадоў таму беларусы ўжо пратэставалі супраць Лукашэнкі і Расіі — як гэта было14
Каментары