Пераможцу конкурсу «Міс Украіна — 2018» пазбавілі кароны, бо ўскрыліся падрабязнасці яе біяграфіі
Вераніку Дыдусенка, якая 21 верасня стала пераможцай конкурсу «Міс Украіна — 2018», дыскваліфікавалі і пазбавілі тытула.
Пра гэта гаворыцца ў афіцыйнай заяве аргкамітэта Нацыянальнага конкурсу прыгажосці «Міс Украіна».
Такое рашэнне камітэт прыняў пасля таго, як аказалася, што Вераніка Дыдусенка знаходзілася ў шлюбе, што супярэчыць правілам конкурсу.
«У сувязі з парушэннем удзельнікам Веранікай Дыдусенка умоў дагавора і Правілаў правядзення Нацыянальнага конкурсу прыгажосці «Міс Украіна», яе дыскваліфікавалі», — гаворыцца ў заяве аргкамітэта. Па правілах конкурсу, усе яго ўдзельніцы не павінны быць у шлюбе да або падчас конкурсу і не мець дзяцей.
«Вераніка Дыдусенка падала недакладную інфармацыю, пацвярджаючы, што не знаходзілася ў шлюбе і не мае дзяцей», — растлумачылі ў камітэце. Выканаўчы дырэктар конкурсу Вікторыя Кіёсе адзначыла, што ў аргкамітэце інфармацыю аб сямейным становішчы Дыдусенка атрымалі ад журналістаў, пасля чаго звязаліся з Веранікай і атрымалі пацвярджэнне ад яе. У сувязі з гэтым у найбліжэйшы час той жа склад журы пераабярэ Міс Украіна — 2018.
Вераніка Дыдусенка нарадзілася і вырасла ў Кіеве. Скончыла гуманітарны ліцэй імя Лесі Украінкі, атрымала ступень бакалаўра ў Кіеўскім нацыянальным універсітэце імя Тараса Шаўчэнкі па спецыяльнасці матэматыка. Цяпер вывучае фінансы і інвестыцыі. Паралельна працуе мадэллю ў вядучых агенцтвах Парыжа і Мілана, з брэндамі Maison Margela і Escada.
Каментары