У Мінску не далі скончыць канцэрт, арганізаваны непрызнаваным Саюзам палякаў
Святочны канцэрт у Мінску з нагоды стагоддзя аднаўлення незалежнасці Польшчы, арганізаваны мясцовым аддзяленнем непрызнаванага ўладамі Саюза палякаў Беларусі, быў скончаны праз паўгадзіны пад ціскам адміністратара залы, піша znadniemna.pl.
Раней тры розныя ўласнікі адмаўлялі ў арэндзе памяшкання. Як растлумачыла кіраўніца мінскага аддзялення Саюза палякаў Алена Марчукевіч у дзвюх залах было адмоўлена нават у выходныя дні. Каля 200 чальцоў СПБ сабраліся перад трэцім памяшканнем, але і там сутыкнуліся з адмовай.
У апошні момант удзельнікі пераехалі на чацвёртае месца, але праз паўгадзіны адміністратар запатрабаваў скончыць мерапрыемства.
У кароткай прамове кіраўнік незарэгістраванага СПБ Анжаліка Борыс адзначыла, што абавязак палякаў у Беларусі — дбаць пра польскія мемарыялы, бо «незалежнасць вымяраецца крыжамі — на магілах нашых дзядоў і прадзедаў».
Пасол Польшчы ў Беларусі Артур Міхальскі падзякаваў прысутным, што прыйшлі на цырымонію. Ён падкрэсліў, што свабода і незалежнасць з'яўляюцца універсальнымі каштоўнасцямі.
Прыкладна праз паўгадзіны пасля пачатку канцэрту, падчас якога праспявалі польскі нацыянальны гімн і некалькі патрыятычных песень, работнік выключыў святло, а праз нейкі час запатрабаваў скончыць мерапрыемства.
Анжаліка Борыс заклікала прысутных разысціся мірна і не паддавацца на правакацыі.
Варта адзначыць, што людзей сабралася столькі, што яны не змясціліся ў залу.
Саюз палякаў у Беларусі (СПБ) падтрымліваў беларускі рух за нацыянальныя і грамадзянскія правы. У адказ улады Беларусі прыкладна ў 2005 годзе распачалі ціск на СПБ. Яны стварылі падкантрольны сабе альтэрнатыўны Саюз палякаў, але большасць актывістаў засталіся прыхільныя арганізацыі на чале з Анжалікай Борыс. СПБ карыстаецца падтрымкай Польшчы, якая фінансавала пабудову «Дамоў Польскіх» і выхад польскамоўнай прэсы.
Цяпер чытаюць
«Лукашэнка мне сказаў: «Хочаш — можаш адказаць нам, ударыць па Мазыры, па заводзе» — Зяленскі32
Каментары