Амаль два месяцы прайшло з моманту затрымання на беларуска‑польскай мяжы ў Брэсце 10 асобнікаў часопіса «ARCHE», публікацыі ў якіх выклікалі ў мытнікаў падазрэнні наконт экстрэмізму. Але дагэтуль немагчыма даведацца пра лёс адабраных часопісаў.
24 кастрычніка 2008 года супрацоўніца мытні Рэната Нядбаева палічыла, што звесткі, якія ўтрымліваюцца ў № 7–8 часопіса «ARCHE», «могуць нанесці шкоду нацыянальным інтарэсам Рэспублікі Беларусь». 10 асобнікаў выдання, знойдзеныя ў багажы грамадзяніна Беларусі, былі забраныя на экспертызу.
Начальнік аддзела мытных расследаванняў Брэсцкай мытні Уладзімір Закржэўскі, у якога служба маніторынгу ГА «БАЖ» спрабавала высветліць, якую канкрэтна публікацыю мытнікі лічаць «шкоднай», адмовіўся адказваць на пытанні. Ён патлумачыў, што на гэта патрэбна санкцыя яго кіраўніцтва.
Прэс‑сакратар Брэсцкай мытні Сяргей Малеў таксама не змог праясніць сітуацыю. Ён толькі адзначыў, што вынікі экспертызы прыйшлі яшчэ 5 лістапада, пасля чаго Брэсцкая мытня накіравала справу ў суд Маскоўскага раёна Брэста.
Звычайна падобныя справы разглядаюцца ў судовых установах на працягу 10–15 дзён, у залежнасці ад занятасці суддзяў. Але ў гэтым выпадку ўсе спробы даведацца ў Маскоўскім раённым судзе Брэста пра лёс затрыманых асобнікаў «ARCHE» поспеху не мелі.
У прыёмным пакоі старшыні суда і канцылярыі такіх звестак журналістам не даюць, а намесніца старшыні суда Таццяна Міранюк, адказная за разгляд грамадзянскіх спраў, адмовілася гутарыць з карэспандэнтам службы маніторынгу БАЖ па тэлефоне, спаслаўшыся на занятасць.
Не змог атрымаць інфармацыі пра часопіс і яго рэдактар Валерый Булгакаў.
«На мае пытанні, ці паступіла ў суд экспертнае заключэнне, што ў ім паведамляецца і ці прызначана дата разгляду справы, супрацоўнікі Маскоўскага суда не адказвалі і толькі перанакіроўвалі адзін да другога. Урэшце 28 лістапада рэдакцыя часопіса накіравала афіцыйны запыт у суд, і зараз мы чакаем адказу», — паведаміў сп. Булгакаў.
Нагадаем, напрыканцы лістапада галоўны рэдактар «ARCHE» В. Булгакаў атрымаў з Дзяржаўнага мытнага камітэту адказ на свой зварот з нагоды затрымання часопіса. Намеснік старшыні камітэта Сяргей Барысюк паведаміў, што ў адпаведнасці з заключэннем упраўлення КДБ па Брэсцкай вобласці ад 5 лістапада ў № 7–8 часопіса «ARCHE» за 2008 год «была прызнана наяўнасць заклікаў да экстрэмісцкай дзейнасці і прапаганды такой дзейнасці».
Цікава, што даведацца пра вынікі суда (калі такі быў) па справе часопіса «ARCHE» не могуць і тыя, хто быў яе ініцыятарам. Паводле прэс‑сакратара Брэсцкай мытні С. Малева, ён таксама не здолеў удакладніць у судзе Маскоўскага раёна.
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць4040
Каментары