Самага вядомага фігуранта «маскоўскай справы» Ягора Жукава прысудзілі да трох гадоў умоўна
Кунцаўскі суд Масквы прысудзіў да трох гадоў пазбаўлення волі ўмоўна студэнта-палітолага Вышэйшай школы эканомікі 21-гадовага Ягора Жукава. Такое рашэнне вынесла суддзя Святлана Ухналёва, перадае РБК.
Пракурор патрабаваў для Жукава чатыры гады рэальнага тэрміну ў калоніі. Суд палічыў даказаным, што Жукаў «здзейсніў публічныя заклікі да экстрэмісцкай дзейнасці», імкнучыся ўцягнуць у яе «неабмежаванае кола карыстальнікаў інтэрнэту». У відэароліках у блогу Жукава суд пабачыў «заклікі да змены ўлады ў Расіі, у тым ліку гвалтоўным шляхам», а таксама заклікі да такіх спосабаў бунту, як нявыплата падаткаў або выраб фальшывых грошай, адзначыла Ухналёва. Суддзя спаслалася на высновы экспертаў-крыміналістаў, прыцягнутых да справы следствам: яны адзначылі, што ў відэароліках Жукава прысутнічае «ідэя нянавісці да ўлады як крыніцы бед насельніцтва».
Меркаванне абароны (адным з адвакатаў быў Ілля Новікаў) пра тое, што ведамасныя эксперты не валодаюць неабходнай кваліфікацыяй і адукацыяй, суд палічыў надуманымі. «Указанне абароны на тэндэнцыйнасць следства не знаходзіць свайго аб'ектыўнага пацвярджэння», — таксама заключыла Ухналёва.
Падтрымаць Жукава на суд прыйшлі галоўны рэдактар «Новай газеты» Дзмітрый Муратаў, прарэктар ВШЭ Валерыя Касамара, сустаршыня Маскоўскай Хельсінкскай групы Валерый Баршчоў. У будынку суда ў часе пасяджэння сабраліся дзясяткі чалавек, якія скандавалі «Адпускай» і «Прысуд усяму пакаленню».
Ягор Жукаў — самы вядомы фігурант «справы 27 ліпеня», заведзенай у дачыненні да ўдзельнікаў акцый пратэсту супраць адмовы рэгістраваць апазіцыйных кандыдатаў у Масгардуму. Ён аўтар палітычнага відэаблогу. Пасля арышту Жукава асабістыя паручальніцтвы за яго падпісалі 612 чалавек, у тым ліку больш за 300 выкладчыкаў ВШЭ.
Раней на судах студэнта падтрымлівалі акторка Чулпан Хаматава, пісьменнік Дзмітрый Быкаў і рэпер Oxxxymiron — апошні быў гатовы ўнесці за Жукава заклад у 2 млн расійскіх руб. Галоўныя рэдактары «Эхо Москвы» і «Новай газеты» Аляксей Венядзіктаў і Дзмітрый Муратаў далі суду гарантыю, што ў выпадку вызвалення Жукава гатовыя ўзяць яго на працу.
Каментары