Samaha viadomaha fihuranta «maskoŭskaj spravy» Jahora Žukava prysudzili da troch hadoŭ umoŭna
Kuncaŭski sud Maskvy prysudziŭ da troch hadoŭ pazbaŭleńnia voli ŭmoŭna studenta-palitołaha Vyšejšaj škoły ekanomiki 21-hadovaha Jahora Žukava. Takoje rašeńnie vyniesła sudździa Śviatłana Uchnalova, pieradaje RBK.
Prakuror patrabavaŭ dla Žukava čatyry hady realnaha terminu ŭ kałonii. Sud paličyŭ dakazanym, što Žukaŭ «ździejśniŭ publičnyja zakliki da ekstremisckaj dziejnaści», imknučysia ŭciahnuć u jaje «nieabmiežavanaje koła karystalnikaŭ internetu». U videarolikach u błohu Žukava sud pabačyŭ «zakliki da źmieny ŭłady ŭ Rasii, u tym liku hvałtoŭnym šlacham», a taksama zakliki da takich sposabaŭ buntu, jak niavypłata padatkaŭ abo vyrab falšyvych hrošaj, adznačyła Uchnalova. Sudździa spasłałasia na vysnovy ekśpiertaŭ-kryminalistaŭ, pryciahnutych da spravy śledstvam: jany adznačyli, što ŭ videarolikach Žukava prysutničaje «ideja nianaviści da ŭłady jak krynicy bied nasielnictva».
Mierkavańnie abarony (adnym z advakataŭ byŭ Illa Novikaŭ) pra toje, što viedamasnyja ekśpierty nie vałodajuć nieabchodnaj kvalifikacyjaj i adukacyjaj, sud paličyŭ nadumanymi. «Ukazańnie abarony na tendencyjnaść śledstva nie znachodzić svajho abjektyŭnaha paćviardžeńnia», — taksama zaklučyła Uchnalova.
Padtrymać Žukava na sud pryjšli hałoŭny redaktar «Novaj haziety» Dźmitryj Murataŭ, prarektar VŠE Valeryja Kasamara, sustaršynia Maskoŭskaj Chielsinkskaj hrupy Valeryj Barščoŭ. U budynku suda ŭ časie pasiadžeńnia sabralisia dziasiatki čałaviek, jakija skandavali «Adpuskaj» i «Prysud usiamu pakaleńniu».
Jahor Žukaŭ — samy viadomy fihurant «spravy 27 lipienia», zaviedzienaj u dačynieńni da ŭdzielnikaŭ akcyj pratestu suprać admovy rehistravać apazicyjnych kandydataŭ u Mashardumu. Jon aŭtar palityčnaha videabłohu. Paśla aryštu Žukava asabistyja paručalnictvy za jaho padpisali 612 čałaviek, u tym liku bolš za 300 vykładčykaŭ VŠE.
Raniej na sudach studenta padtrymlivali aktorka Čułpan Chamatava, piśmieńnik Dźmitryj Bykaŭ i repier Oxxxymiron — apošni byŭ hatovy ŭnieści za Žukava zakład u 2 młn rasijskich rub. Hałoŭnyja redaktary «Echo Moskvy» i «Novaj haziety» Alaksiej Vieniadziktaŭ i Dźmitryj Murataŭ dali sudu harantyju, što ŭ vypadku vyzvaleńnia Žukava hatovyja ŭziać jaho na pracu.
Ciapier čytajuć
Što viadoma pra byłoha palitviaźnia Sakałoŭskaha, jaki pamior u Bierlinie ŭ 47 hadoŭ1
Kamientary