Адвакатам прапануюць аддаваць 40% даходу, а пры звышдаходах — 90%
У распараджэнне «Нашай Нівы» трапіў ліст старшыні Рэспубліканскай калегіі адвакатаў Віктара Чайчыца, які прапануе адвакатам выказацца па тэме імавернага скарачэння іх уласных даходаў.
Сам ліст у сваім тэлеграм-канале апублікаваў журналіст Арцём Гарбацэвіч.
Чайчыц прыводзіць у прыклад прынцып сплаты ўнёскаў у натарыусаў: 40% з прыбытку да 2000 рублёў і 90% з прыбытку больш за 9000 рублёў.
Ён прапануе перайсці да падобнай сістэмы і ініцыяваць змены ў адпаведных законах.
Цяпер, напрыклад, адвакаты плоцяць фіксаваныя ўнёскі ў залежнасці ад рэгіёна.
«Ні аб якім пераглядзе гаворка пакуль не ідзе, гаворка аб тым, каб даведацца меркаванне адвакатаў па канкрэтных пытаннях. Канкрэтна будзем гаварыць пасля 23 снежня», — сказаў «Нашай Ніве» Віктар Чайчыц.
Што думаюць адвакаты?
Варта сказаць, што яны не каментуюць сітуацыю ад свайго імені, бо не хочуць публічна крытыкаваць Чайчыца.
«Скажам, зарабіў я 2400 рублёў: спачатку аддам 40%, потым у ФСАН недзе 120 рублёў, потым падатак 13%, а ўсё астатняе мне. Каму ад гэтых зменаў будзе лепш?
Тут пытанне, куды пойдуць грошы — у адвакатаў жа няма фіксаванага заробку, сацыяльный гарантый у выглядзе адпускных ці аплаты бальнічнага. Калі б гэтыя грошы ішлі туды — можа быць, калі на нешта іншае — ну дык трэба тады і шукаць, каму гэта выгадна.
Каб маладому адвакату зарабіць, трэба ездзіць па ўсёй краіне і знаходзіць кліента, мяне вось часцяком заносіць у іншыя вобласці. І я лічу, што калі такі прынцып прымуць, то гэта ўдарыць па маладых адвакатах», — сказаў «Нашай Ніве» адвакат, які некалькі год працуе ў адным з раённых цэнтраў.
«Галіну наперад штурхаюць прафесіяналы, а адзін са стымулаў развіцця прафесіяналаў — высокі заробак. Ініцыятыва Чайчыца фактычна ўсталёўвае столь заробку ў галіне ў $4500 [з кожнага наступнага заробленага рубля адвакат пакіне сабе 10 капеек — Рэд.]. Гэта прыкладна $50 тысяч на год. Магчыма, мяне закідаюць камянямі, але гэта вельмі нізкая столь — калі браць Маскву, то гэта заробак дасведчанага юрыста, але далёкі ад максімуму. Калі ў нас гэта будзе максімум для ўсіх адвакатаў, уключна з вопытнымі партнёрамі з велізарным стажам, то многія з тых, хто маглі б рухаць галіну наперад, пяройдуць на іншую працу. Або пачнуцца шэрыя схемы з вялікімі роялці і касмічныя арэнды офісаў у афіляваных асоб», — тлумачыць іншы юрыст.
Адзін з вядомых адвакатаў патлумачыў, што супольнасць рэагуе на ліст Чайчыца вельмі нервова і ўспрымае гэта як спробу дзяржавы пабудаваць за кошт адвакатаў будынак адвакатуры.
Памятаеце кадэта, які на сустрэчы з Лукашэнкам смела выступіў па-беларуску? Ён выехаў з краіны21
Каментары