Пасол Расіі ў Беларусі Дзмітрый Мезенцаў ацэньвае суму міжбюджэтных трансфертаў у рамках двухбаковых разлікаў за нафту на ўзроўні дзясяткаў мільёнаў даляраў. Дакладны аб'ём трансферту на карысць Мінска будзе вызначаны па выніках фактычнага аб'ёму паставак расійскай нафты ў 2020 годзе, піша Interfax.by.
«Канчатковую суму кампенсацыі або, скажам, льгатавання паставак нафты з боку расійскіх партнёраў можна будзе вызначыць, калі па выніках года мы будзем ведаць, колькі ўсяго спажылі два [беларускія — ІФ] НПЗ … Мы дакладзём, як толькі будзе закрыты баланс гэтага года, без утойвання, на якія дзясяткі і дзясяткі мільёнаў даляраў была аказана падтрымка ў энерга-нафтавай сферы Беларусі», — сказаў Мезенцаў журналістам у сераду ў Мінску.
Пасол пацвердзіў, што механізм міжбюджэтнага трансферту будзе зацверджаны бакамі ў найбліжэйшы час. Каментуючы механізм, ён растлумачыў, што гаворка ідзе пра памнажэнне сумы кампенсаванай з бюджэту РФ прэміі пастаўшчыкам нафты на фактычны аб'ём паставак сыравіны. «Мяркуецца памножыць аб'ём пастаўленай Беларусі з РФ нафты на лічбу [памер прэміі пастаўшчыкам — ІФ], якая будзе ў найбліжэйшы час замацаваная ў тых пагадненнях, якія будуць падпісаныя. Гэта проста будзе арыфметычнае перамнажэнне», — адзначыў дыпламат.
Расійскі пасол ацэньвае ўзгоднены мэханізм як «вынік асаблівых саюзніцкіх адносін расійскага боку да брацкай Беларусі». «Гэта сур'ёзныя крокі ў падтрымку таго запыту, які быў пазначаны з Мінска ў канцы мінулага года — пачатку гэтага года. Сума значная», — лічыць Мезенцаў.
Каментары