Лукашэнка запрасіў Папу ў Беларусь
Сёння апоўдні па беларускім часе адбылася сустрэча Папы Рымскага Бенедыкта XVI з кіраўніком Беларусі Аляксандрам Лукашэнкам. Коля таксама ў Ватыкане.
Папа Бенедыкт XVI прыняў 27 красавіка ў Ватыкане прэзідэнта Беларусі Аляксандра Лукашэнку. Асабістая аўдыенцыя працягвалася 25 хвілін, паведамляюць італьянскія СМІ.Бакі абмеркавалі перспектывы пашырэння супрацоўніцтва паміж Беларуссю і Ватыканам.
«Падчас размовы, якая праходзіла ў пазітыўнай атмасферы, былі абмеркаваны праблемы, што тычыліся адносінаў веры і розуму, міжканфесійнага і міжкультурнага дыялогу, — гаворыцца ў паведамленні прэс‑службы Ватыкана. — Апрача таго, абмяркоўваліся тэмы міжнароднага характару адносна прасоўвання справы міру і рэальнага прагрэсу чалавецтва, а таксама некаторыя ўнутраныя праблемы Беларусі, якія тычацца каталіцкай царквы і перспектыў пашырэння супрацоўніцтва».
Як зазначае прэс‑служба, пасля аўдыенцыі ў Бенедыкта XVI Лукашэнка сустрэўся з дзяржсакратаром Ватыкана кардыналам Тарчызіё Бэртонэ і сакратаром па адносінах з дзяржавамі Даменікам Мамберці.
Сустрэча пантыфіка з А.Лукашэнкам доўжылася каля 25 хвілін. А.Лукашэнка запрасіў Бенедыкта XVI наведаць Беларусь, «калі на тое будзе воля Госпада». «Наша сустрэча зацягнулася на доўгія гады», — заявіў А.Лукашэнка.
Пантыфік падарыў А.Лукашэнку сувенірную манету, беларускі кіраўнік — вобраз Ісуса Хрыста, зроблены з беларускіх прыродных матэрыялаў.
На сустрэчы А.Лукашэнкі з Т.Бэртонэ размова ішла аб заключэнні пагаднення паміж Беларуссю і рымска‑каталіцкай царквой па аналогіі з дагаворам, які існуе паміж Беларуссю і праваслаўнай царквой.Было заяўлена, што такое пагадненне будзе падпісана. Апрача таго, бакі абмеркавалі пытанні супрацоўніцтва ў сферы навукі, культуры, архіўнай і бібліятэчнай справы.
Як зазначае «Радыё Ватыкана», Лукашэнка прыбыў да ўваходу ў Апостальскі палац каля 11 гадзін раніцы па мясцовым часе (у 12 гадзін па мінскім). Яго ў прысутнасці роты швейцарскіх гвардзейцаў прывітаў прэфект палаца разам з ганаровымі камергерамі, якія праводзілі беларускага прэзідэнта ў залу прыёмаў папы Бенедыкта XVI.
А.Лукашэнку суправаджалі міністр замежных спраў Беларусі Сяргей Мартынаў і пасол Беларусі пры Святым Пасадзе Сяргей Алейнік. Паводле інфармацыі «Радыё Ватыкана»,
у склад беларускай дэлегацыі ўваходзяць «яшчэ каля 12 чалавек». Сярод іх быў малодшы сын А.Лукашэнкі Мікалай.
Чакаецца, што ў Італіі А.Лукашэнка сустрэнецца з прэм’ер‑міністрам Італіі Сільвіё Берлусконі і міністрам замежных спраў краіны Франка Фраціні.
У адкрытым доступе апублікавалі базу 4000 штатных супрацоўнікаў КДБ, імёны агентаў і інфарматараў не называюць6
Каментары