У Мінску п'яны на каршэрынгавым аўто ўцякаў ад ДАІ, знёс дарожны знак і ўрэзаўся ў дрэва
У мінулую суботу на вуліцы Кіжаватава ўвагу супрацоўнікаў ДАІ прыцягнуў каршэрынгавы аўтамабіль «Кіа». Машына рухалася няўпэўнена, піша прэс-служба ДАІ Мінска..
Інспектары падалі кіроўцу знак спыніцца, але ён яго праігнараваў, працягнуў рух і павярнуў на вуліцу Брылеўскую.
Экіпаж ДАІ пачаў пераслед. Каля дома №46 кіроўца не даў рады кіраванню, збіў дарожны знак і ўрэзаўся ў дрэва. Аўтамабіль атрымаў механічныя пашкоджанні.
Аказалася, што кіроўца «Кіа» ў момант здарэння знаходзіўся ў стане алкагольнага ап'янення. У выдыханым парушальнікам паветры было два праміле алкаголю.
Ад 1 сакавіка стала больш жорсткім пакаранне ў дачыненні да нецвярозых кіроўцаў. Цяпер, калі ў выдыханым паветры ад 0,3 да 0,8 праміле алкаголю, кіроўцу пагражае пакаранне ў выглядзе штрафу ў памеры 100 базавых велічынь і пазбаўленне права кіравання тэрмінам на 3 гады. Калі звыш 0,8 праміле — штраф будзе ўжо складаць 200 базавых велічынь з пазбаўленнем права кіравання на 5 гадоў.
Каментары