Палітвязень у апошнім слове: Для мяне гонар стаяць у адным шэрагу з Ціханоўскім
У судзе Фрунзенскага раёна Мінска працягнуўся разгляд крымінальнай справы палітзняволенага, дызайнера Дзмітрыя Кубарава.
Яго вінавацяць у арганізацыі масавых беспарадкаў і намеры вырабіць «кактэйль Молатава». Памочніца пракурора Аліна Касьянчык запрасіла для яго сем гадоў пазбаўлення волі ўзмоцненага рэжыму, паведамляюць праваабаронцы.
Сёння Кубараў выступіў з апошнім словам.
«Я напісаў прамову, але браць яе з сабой я не бачыў сэнсу. Таму што нават за гэтай клеткай лічу сябе больш свабодным, чым многія людзі, якія сядзяць тут у пагонах, у мундзірах і гэтак далей. Я нават не спадзяюся, што яны мяне зразумеюць. Мне застаецца толькі ганарыцца тым, што я зрабіў і тым, чаго не зрабіў. Ганарыцца тым, кім стаў і кім не стаў насуперак таму, што мне выстаўляюць. Для мяне гонар стаяць у адным шэрагу з такімі людзьмі, як Сяргей Ціханоўскі, Святлана Ціханоўская, Юрый Уласаў, Антон Бяленскі, Цапкала… Я не здзяйсняў тых злачынстваў, у якіх мяне абвінавачваюць. На гэтым усё».
Прысуд па справе Дзмітрыя Кубарава будзе агучаны 24 сакавіка.
11 жніўня Дзмітрый быў жорстка затрыманы і дастаўлены ў СІЗА КДБ. У ноч з 11 на 12 жніўня там жа падпісаў яўку з павіннай. У яго кватэры прайшоў ператрус, пасля якога ў яго канфіскавалі рупар, медыкаменты, ваду, тэхніку (тэлефон, ноўтбук), каністры з растваральнікам і скіпінар, якія выкарыстоўваліся для рамонту кватэры. З таго моманту (7 месяцаў) ён утрымліваецца пад вартай. На судзе Дзмітрый не прызнаў сваю віну і заявіў пра катаванні пасля затрымання.
Цяпер чытаюць
Хочаце жыць доўга — шукайце раён з нармальнымі дрэвамі. Навукоўцы высветлілі, што дрэвы ратуюць ад інфарктаў, а газоны могуць нават нашкодзіць здароўю22
Каментары