Cуд Бярозаўскага раёна 26 сакавіка пакараў жыхара аграгарадка Малеч Генадзя Клімашэвіча па 24.23 ч. 1 КаАП 20 базавымі велічынямі (580 рублёў) за «несанкцыянаваны пікет». Пастанову вынесла суддзя Алена Нямкова, піша spring96.org.
24 сакавіка напярэдадні Дня Волі супрацоўнікі Бярозаўскага РАУС затрымалі Клімашэвіча за вывешаны на балконе дома намаляваны герб «Пагоня» і да суда змясцілі ў ізалятар часовага ўтрымання, зняты герб пры гэтым забралі, паведамляюць мясцовыя праваабаронцы.
А ў лютым супрацоўнікі Бярозаўскага РАУС выявілі і прымусілі Генадзя Клімашэвіча зафарбаваць бел-чырвона-белы сцяг, намаляваны на тым жа балконе, можа больш як паўгода таму.
На судзе Генадзь Клімашэвіч заявіў, што герб «Пагоня» афіцыйна зарэгістраваны як гістарычная нацыянальная каштоўнасць. Але пад націскам суддзі, чаму ён павесіў герб не ў кватэры, а на балконе, ён, не спадзеючыся на апраўдальны прысуд і жадаючы хутчэй выйсці на волю, прызнаў сябе вінаватым. Таму разгляд справы прайшоў па спрошчанай працэдуры — без выкліку сведак-міліцыянтаў.
Дарэчы, з мясцовага саўгаса, дзе Клімашэвіч працуе шафёрам, званілі і ў РАУС, і ў суд, каб яго хутчэй выпусцілі, бо ў гаспадарцы не хапае кіроўцаў.
Лукашэнка знайшоў незвычайныя словы для спачування Хаменеі: «вераломная атака»27
Каментары