Саудаўскі праект «разумнага горада» Неом часам пераўзыходзіць межы разумнага
Амбіцыі наследнага прынца Саудаўскай Аравіі шакуюць нават праектантаў.
Калі наследны прынц Саудаўскай Аравіі Мухамед ібн Салман здзейсніць сваю мару коштам 500 мільярдаў даляраў, на месцы пустыні з’явіцца горад будучыні Неом, які мусіць прыцягнуць вялізныя інвестыцыі. Гэта, у сваю чаргу, дапаможа каралеўству зменшыць сваю залежнасць ад нафты да таго, як яе запасы ў краіне скончацца, піша The Wall Street Journal.
Слова «неом» утворана ад грэчаскай прыстаўкі «нео» ў значэнні «новы», а чацвёртую літару ўзялі з арабскай абрэвіятуры, што расшыфроўваецца як «будучыня».
Аднак пакуль распрацоўка праекта ідзе марудна, а работнікі масава сыходзяць праз непаразуменні на глебе амбіцый прынца датычна бачання праекта.
Напрыклад, інжынеры змагаюцца з патрабаваннямі зрабіць паглыбленне ў схіле гары на 30 паверхаў углыб і 800 метраў удоўжкі для размяшчэння там гатэляў і рэзідэнцый. Яшчэ адзін канфлікт разгарэўся на фоне дырэктывы аб будаўніцтве 10 палацаў, кожны з якіх большы за футбольнае поле. Гэта прымусіла супрацоўнікаў задумацца пра мэтазгоднасць будаўніцтва такіх раскошных будынкаў, якія будуць каштаваць каля 400 мільёнаў даляраў кожны.
Архітэктары прапаноўваюць больш простую і рэалістычную планіроўку горада, але прынц загадвае думаць шырэй.
35-гадовы Мухамед ібн Салман мае грандыёзныя планы на Неом. Адна з задумак — пабудаваць у цэнтры Неома лінейны горад без машын на 170 км удоўжкі, які будзе злучаны з астатнімі часткамі праекта высакахуткасным цягніком.
«Разумны» горад будуць акружаць яшчэ 4 іншыя аб’екты — заліў Неом, раён Акабы, гара Неом і прамысловы горад. Мяркуецца, што Неом будзе мець 14 прамысловых сектараў, у тым ліку энергетыку і вытворчасць прадуктаў харчавання.
Некаторыя эксперты скептычна ставяцца да такіх планаў, якія, на іх думку, немагчыма ажыццявіць. Многія супрацоўнікі перакананыя, што праект не прыцягне дастатковую колькасць інвестыцый, а законы, якія каралеўства намагаецца прыняць для Неома, не прыйдуцца даспадобы замежнікам.
Цяперашнія і былыя супрацоўнікі сцвярджаюць, што выканаўчы дырэктар праекта Надмі аль-Наср, які 30 гадоў працаваў у нафтавай кампаніі Aramco, імкнецца рэалізаваць усе жаданні прынца. У выніку супрацоўнікі, незадаволеныя стылем кіравання, адмаўляюцца ад кантрактаў на вялізныя сумы, а некаторыя ўвогуле не змаглі вярнуцца ў Саудаўскую Аравію летась праз абмежаванні. Таму праект ажыццяўляецца марудна.
З Лондана Мельнікава вылецела на Шры-Ланку, у яе быў каханак спартовага выгляду з Беларусі22
Каментары