«Усё гэта ліпа ад пачатку і да канца. Віны сваёй не прызнаю». Яўгена Зялкоўскага з Гомеля за муляжы выбухоўкі асудзілі на 3,5 года калоніі
У судзе Цэнтральнага раёна Гомеля 18 мая вынесены прысуд па крымінальнай справе аб закладцы «муляжа выбухоўкі», піша spring96.org.
На лаве падсудных — 31-гадовы Яўген Зялкоўскі. Спачатку яго вінавацілі ў асабліва злосным хуліганстве па ч. 3 артыкула 339 КК РБ, за што прадугледжаная крымінальная адказнасць у выглядзе пазбаўлення волі аж да 10 год, потым артыкул змянілі на частку 2. Суд праходзіў фактычна ў закрытым рэжыме.
Справу разглядала суддзя Алеся Осіпава.
Мужчыну абвінавачвалі ў тым, што восенню мінулага года ён двойчы ўсталёўваў у бязлюдных месцах бел-чырвона-белыя сцягі, размяшчаючы паблізу скрынкі, якія можна было прыняць за выбуховыя прылады. На справе ж у скрынках знаходзіліся пара падшыпнікаў, петарда без змесціва і карыкатура на АМАП.
У апошнім слове Яўген Зялкоўскі паказаў на многія супярэчнасці і нестыкоўкі ў матэрыялах следства, распавёў, што месца, дзе знайшлі нібыта выбухоўку, было разрытае амапаўцамі яшчэ да прыезду спецыялістаў піратэхнічнай службы, сцяг валяўся на зямлі. Мусіць амапаўцы ведалі, што там нічога выбухнуць не магло. І ніякай небяспекі муляж не ўяўляў. Значыць зманілі.
«Я грамадзянін сваёй краіны, люблю свой народ і маю права выказваць сваё меркаванне, а грамадзянскі парадак я не парушаў. У чым жа вы мяне абвінавачваеце? Здзейсніў з асаблівым цынізмам… палітычная варажнеча… Калі гэты народ затрымліваюць, заломліваюць рукі, травяць газам — дык вось гэта і ёсць палітычная варажнеча. Палітычнай варажнечы больш у дзеяннях супрацоўнікаў органаў, якія пасля майго змяшчэння ў ІЧУ, хлусяць у твар цяжарнай жонцы, што не ведаюць, дзе я знаходжуся. За той час, які я правёў у СІЗА, я пераканаўся, наколькі ў нас добрыя людзі. Быў гвалт, псіхалагічны ціск на мяне і сведак. Таму і мянялі яны некалькі разоў свае паказанні», — казаў ён.
«Усё гэта ліпа ад пачатку і да канца. Віны сваёй я не прызнаю».
Сёння суддзя суда Цэнтральнага раёна Алеся Осіпава вынесла прысуд Яўгену Зялкоўскаму — 3.5 года пазбаўлення волі ў калоніі агульнага рэжыму.
Цяпер чытаюць
Арыштаваны 75‑гадовы Зміцер Санько — ветэран-выдавец2
Каментары