У Літве работнікі самі будуць плаціць за рэгулярныя ПЛР-тэсты, калі не хочуць прышчапляцца. Цяпер іх аплачвае дзяржава
За абавязковыя тэсты на COVID-19 з 1 снежня ў Літве будуць плаціць самі работнікі, якія павінны рэгулярна прышчапляцца. Такі праект закона ўрад перадаў на разгляд у парламент, піша Delfi.lt.
Ранейшай прапановы кабміна — увесці для работнікаў пэўных сфер абавязковыя прышчэпкі — не засталося.
Цяпер прафілактычнае тэсціраванне ажыццяўляецца на бюджэтныя сродкі, а калі парламент прыме змены — праверка здароўя на прадмет наяўнасці каранавіруса будзе праводзіцца за кошт работніка, а калі працадаўца вырашае — за кошт працадаўцы, патлумачыў міністр аховы здароўя Арунас Дулькіс.
«Ёсць два выключэнні, калі праверка здароўя будзе праводзіцца за кошт бюджэту: калі работнік не можа прышчапляцца з-за медыцынскіх супрацьпаказанняў або калі не забяспечваецца даступнасць вакцын», — адзначыў міністр.
Урад у сераду зацвердзіў такі праект Закона аб прафілактыцы і кантролі заразных захворванняў чалавека, ён уносіцца ў сейм, які і прыме канчатковае рашэнне. Урад прапануе сейму разгледзець папраўкі ў парадку асаблівай тэрміновасці. Прапануецца, каб такі парадак уступіў у сілу з 1 снежня.
Прадстаўляючы прапанову ўрада пазней на прэс-канферэнцыі, прэм'ер Інгрыда Шыманіце сказала, што тэсціраванне для непрышчэпленых людзей за кошт падаткаплацельшчыкаў было зразумела, калі ў краіне не было дастаткова вакцын, а цяпер, ва ўмовах вольнага доступу да вакцынавання, яго было б «цяжка растлумачыць і апраўдаць».
Паводле яе слоў, цяпер тэсты непрышчэпленых людзей «абыходзяцца падаткаплацельшчыкам больш чым у дзесяць мільёнаў еўра, і могуць быць апраўданыя ў тым выпадку, калі няма альтэрнатыўных сродкаў кіравання пандэміяй, гэта значыць вакцын».
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню58
Каментары