Не чакайце імунітэту на наступны дзень пасля прышчэпкі. Доктар — пра вакцынацыю цяжарных і не толькі
Ужо трэці тыдзень у Вілейцы вакцынуюць супраць каранавіруса цяжарных жанчын. Праўда, да такой прапановы будучыя мамы пакуль ставяцца з асцярогай, піша «Рэгіянальная газета».
— Гэта і зразумела: хвалююцца за сябе і за дзіця, — кажа загадчыца паліклінікі Вілейскай ЦРБ Таццяна Аляксандраўна Рамера. — Аднак даследаванні паказваюць, што заражэнне вірусам вельмі небяспечнае для цяжарных. Калі жанчына захварэе, яна можа нават згубіць дзіця.
Чытайце таксама:
«Дактары сказалі, што я не адна такая». Цяжарная мінчанка захварэла на кавід — і страціла дзіця
Таму вакцынавацца варта. Але ж мы не можам нікога прымусіць. Тлумачым, пераконваем.
Тыя цяжарныя, якія ўжо прышчапіліся, не звярталіся да нас з ускладненнямі. Натуральнай рэакцыяй арганізма можа быць тэмпература. Асабліва ў маладых жанчын, у якіх добры імунітэт. Мы ўсіх папярэджваем пра гэта.
Па словах доктара, асаблівай розніцы ў тым, на якім тэрміне цяжарнасці прышчапляцца, няма. Аднак на 38-40 тыдні рабіць гэта ўжо няма сэнсу. Лепш прышчапіцца пасля родаў. Бо жанчыны, якія кормяць дзіця грудным малаком, дастаткова ўразлівая для вірусаў катэгорыя.
Таксама доктар раіць цяжарным прышчапіцца і ад грыпу.
Гэта сезонная хвароба, якую ніхто не адмяняў. Прэпаратам вакцынуюць ужо дзесяць гадоў. Ён добра сябе зарэкамендаваў.
Яшчэ Таццяна Аляксандраўна звяртае ўвагу на наступныя моманты:
— Часта можна пачуць: «Зрабіў прышчэпку, а праз дзень-два захварэў. Прышчэпка не працуе». Але гэта не так. Імунітэт супраць хваробы выпрацоўваецца прыкладна на дваццаты дзень і толькі ў тых, хто зрабіў абедзве дозы вакцыны. Не варта думаць, што зробленая сёння прышчэпка пачне абараняць вас заўтра.
— Хачу заявіць, што на Вілейшчыне ніхто не памёр ад вакцыны. Часам медыкі, якія ходзяць па дамах вакцынаваць людзей у горадзе і на раёне, чуюць: «А вось у адной вёсцы нехта зрабіў прышчэпку і памёр». Гэта няпраўда.
— Вакцына не выключае захворванне на сто працэнтаў. Аднак рызыка цяжкіх формаў і ўскладненняў у правакцынаваных мінімальная.
Цяпер чытаюць
Бабарыка пра сябе ў 2020-м: Гэта не наіўнасць. Не думаю, што такога крыважэрнага сцэнара нехта чакаў38
Каментары