Расійскія ядзерныя бамбардзіроўшчыкі заляцелі ў Беларусь. Эксперт Алесін: «Гэта намёк для Польшчы»
Два вялікія расійскія бамбардзіроўшчыкі Ту-22М3 правялі патруляванне ў небе Беларусі, паведамляе расійскае Мінабароны.
«Цягам палёту адпрацаваны пытанні ўзаемадзеяння з наземнымі пунктамі кіравання ўзброеных сілаў Расіі і Рэспублікі Беларусь», — кажа ведамства.
Такое бывае нячаста, такія жэсты раздражняюць Захад — мінулы раз, падчас леташняга «Славянскага братэрства», у адказ на пралёт расійскай далёкай авіяцыі, ля межаў Беларусі з іншага боку праляцелі натаўскія бамбардзіроўшчыкі.
Навошта цяпер, на пустым месцы дэманстраваць патэнцыйна ядзерную зброю?
«Учора была размова Пуціна і Лукашэнкі — імаверна, была тэма нарошчвання Польшчай ваенных сілаў каля граніц Беларусі, — лічыць ваенны аглядальнік Аляксандр Алесін. — І пралёт бамбардзіроўшчыкаў, якія могуць несці ядзерную зброю, гэта такі намёк на тое, што за спінай у Лукашэнкі стаіць Пуцін. І што прыкрыццё, калі што, будзе, гэта трэба так разумець, я думаю.
Нейкім чынам Расія павінна была такі жэст зрабіць. Перакідваць сухапутныя часці — доўга, адправіць полк ВДВ — вельмі правакатыўна для NATO, а аблёт самалётамі — выглядае нармальна.
Думаю, NATO цяпер не будзе адказваць тым жа самым, амерыканцы не пашлюць свае самалёты, бо Байдэн спрабуе дамовіцца з Пуціным у кітайскім пытанні».
Цяпер чытаюць
Жонка агента-каханка Анжалікі Мельнікавай звязаная з арганізацыяй Руская мадэль эфектыўнага спакушэння15
Каментары