Фільм тыдня: «Камон Камон». Кранальная чорна-белая драма з геніяльным Хаакінам Феніксам
Калі хочаце зрабіць сабе ў чацвер кінавечар, найлепшы выбар — драма «Камон Камон». Тлумачым, чаму гэтая стужка не павінна прайсці міма вас.
Сапраўднае сяброўства людзей з розных міроў
Галоўная зорка стужкі — 47-гадовы Хаакін Фенікс. Вы дакладна памятаеце яго па карціне 2019 года «Джокер», за якую акцёр атрымаў «Оскар» як лепшы выканаўца мужчынскай ролі. А вядомасць Фенікс набыў яшчэ на пачатку 2000-х, калі зняўся ў «Гладыятары» разам з Расэлам Кроу.
У «Камон Камон» Фенікс грае радыёжурналіста Джоні, які падарожнічае па ЗША і гутарыць з дзецьмі пра іх жыццё і будучыню.
У Лос-Анджэлесе ён сустракаецца з Джэсі, сваім дзевяцігадовым пляменнікам. Маці хлопца Віў, сястра Джоні, просіць яго прыгледзець за Джэсі, пакуль яна будзе займацца здароўем мужа — той знаходзіцца на мяжы нервовага зрыву. Адносіны Джоні і яго сястры — асобная гісторыя: яны не размаўлялі год з таго часу, як іх маці памерла, пакутуючы на дэменцыю.
Джоні пагаджаецца на просьбу Віў і накіроўваецца разам з пляменнікам у падарожжа. Разам яны ездзяць па краіне, гутараць і спазнаюць адзін аднаго, ператвараючыся з намінальных сваякоў у сапраўдную сям'ю.
Фільм атрымаў добрыя водгукі крытыкаў і намінацыі на прызы кінафестываляў, у тым ліку на прэстыжную прэмію Брытанскай акадэміі кіно і тэлевізійных мастацтваў (BAFTA). Эксперты ацанілі ігру акцёраў, прычым не толькі зорнага Фенікса, але і маленькага Вудзі Нормана, які сыграў роль Джэсі. Адзначаюць, што карціна, знятая ў чорна-белых колерах, робіцца больш атмасфернай і настальгічнай.
Невядомае дзіця, якому прысвечаны фільм
Цікава, што стужка ўключае ў сябе сапраўдныя інтэрв’ю з амерыканскімі дзецьмі ў розных гарадах краіны: Дэтройце, Нью-Ёрку, Новым Арлеане. Сярод іх — гутарка з дзевяцігадовым Дэвантэ Браянтам, хлопцам з Новага Арлеана, які пазней загінуў у трайным забойстве за месяц да свайго дзясятага дня нараджэння.
Як жа Браянт трапіў у стужку? Рэжысёр карціны Майк Мілз у дзяцінстве шмат камунікаваў з чалавекам з Новага Арлеана. Той расказваў Мілзу пра свой горад і надзяляў яго ледзьве не містычнымі ўласцівасцямі, таму гэтае месца набыло важнасць для хлопца. Цяпер рэжысёр часам уключае ў свае стужкі тэму Новага Арлеана, і «Камон Камон» не стаў выключэннем.
Мілз пазнаёміўся з мастачкай Джэкі Самэл, што якраз жыла ў Новым Арлеане, і дамовіўся з ёй выкарыстоўваць яе дом як дэкарацыі для фільма (пазней дом нават ператварыўся ў вытворчую базу для стужкі). Высветлілася, што мастачка прыглядае за некалькімі дзецьмі са свайго раёна, і адным з іх якраз быў Дэвантэ Браянт. Так ён і яго двое сяброў апынуліся сярод маленькіх зорак карціны.
«Камон Камон» прысвяцілі яго памяці.
Цытата з фільма
«Што б ні здарылася, ідзі наперад (you have to c'mon c'mon c'mon)».
Рэйтынгі на буйных сусветных рэсурсах:
IMDB — 7,6 / 10.
Rotten Tomatoes — 94%.
Падборка камедый пад розныя густы, якія вы раней маглі абмінуць увагай
«Першы сустрэчны». Рамантычная камедыя з Джэніфер Лопез — ідэальны варыянт, каб проста расслабіцца
Цяпер чытаюць
Былы беларускі ваяр суткі катаваў свайго сябра, а пасля забіў сябе1
Каментары