«Патрыятычны камінг-аўт». Беларусы, якія не збіраюцца пакідаць краіну, дзеляцца ў сацсетках сваімі гісторыямі пад хэштэгам #язастаюся
У час калі многія беларусы ў паніцы абдумваюць, як пакінуць краіну, іншыя вырашаюць застацца — што б ні было далей. У сацсетках людзі далучаюцца да флэшмоба #язастаюся, каб тыя, хто не збіраецца з'язджаць, бачылі, што яны не адны.
Адзін з пастоў выклаў шоўмен Андрэй Бонд.
«Я застаюся ў Беларусі. Гэта маё добра абдуманае рашэнне. Тут нарадзіўся, жыў, жыву і буду жыць. Толькі ўзаемная дапамога і падтрымка выратуе нас. Мы нясём культуру, спадчыну, каштоўнасці. Тут наша ўсё.
Павінны ж мы (а хто яшчэ, калі не мы?) пісаць музыку, будаваць дамы, быць вадзіцелямі, афіцыянтамі, бухгалтарамі, кур'ерамі, настаўнікамі і апорай.
Быць падтрымкай для тых, хто мае ў гэтым патрэбу значна больш, чым ты. Старых, дзяцей, жывел і любога, каму можа цяпер спатрэбіцца дапамога.
Хто яшчэ, калі не мы? Калі яшчэ, калi не цяпер? Мне страшна, як і ўсім. Я не ведаю, што будзе заўтра, як і ўсе. У мяне ёсць родныя і блізкія, як і ва ўсіх. Мне ёсць што губляць, як і ўсім. Гэта мой дом, і я застаюся ў Беларусі. Я гэтак вырашыў».
У Інстаграме з дзясятак такіх публікацый пад хэштэгам #язастаюся.
«Хацела б я сказаць, што гэта было самае лёгкае рашэнне ў маім жыцці, але гэта не так — я некалькі разоў адкладвала гэты «патрыятычны камінг-аўт», слухаючы, як шум верталёта з перыядычнай настойлівасцю парушае начную цішыню над горадам. Страшна. Бо незразумела. І ўсё ж я прымаю гэтае рашэнне, зыходзячы з любові, а не з-за страху — гэта мой дом, тут жыве мая сям'я, мае сябры (тыя, хто застаўся), а разам з імі — маё сэрца. Ды і свет я хачу паглядзець у падарожжы, а не ва ўцёках», — напісала мінчанка Дар'я.
«Шчыра кажучы, у апошнія два дні я шмат думала — ехаць у Мінск ці заставацца ў Еўропе, пакуль ёсць такая магчымасць. Як бачыце, я дома — для мяне гэта адзінае слушнае рашэнне на гэты момант. Я не змагу чытаць навіны пра тое, што можа адбывацца ў Беларусі, і тэлефанаваць родным са словамі «ну як вы там».
Я застаюся ў сваёй краіне, каб стаць апорай для людзей, якія тут застаюцца. Для сям'і і блізкіх сяброў, для тых, хто выходзіў і працягвае выходзіць, і для тых, хто толькі ўсвядоміў, што мог зрабіць крышачку больш».
Цяпер чытаюць
Як выглядае стылёвы дом новай рэктаркі Акадэміі мастацтваў коштам паўмільёна даляраў11
Як выглядае стылёвы дом новай рэктаркі Акадэміі мастацтваў коштам паўмільёна даляраў
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары