«Сеў за падс*ачнік ад унітаза. Навошта яго скраў, не вельмі памятае». Жыццёвая гісторыя
Салігорскі актывіст Павел Батуеў падзяліўся ўспамінамі пра некаторых сядзельцаў, з якімі давялося перасекчыся ў ізалятары.
«Пара замалёвак з маёй леташняй адсідкі ў салігорскім ізалятары, каб было зразумела, за што сядзяць цяпер непалітычныя», — піша Павел Батуеў у Фэйсбуку (прыводзім гэты допіс з невялікімі праўкамі).
Дзімон
Чалавек папрасіў у бацькі ключы ад машыны. Бацька ў гэты час трохі накаціў і на раніцу забыўся, што пазычыў ключы сыну. Выклікаў міліцыянтаў і паведаміў, што ягоную машыну ўкралі. Дзімона ўзялі проста на працы, куды ён паехаў на бацькавай машыне. Калі яго прывезлі ў аддзяленне, туды прыехаў бацька і сказаў, што сапраўды забыўся, як сам даў ключы ад машыны сыну і ніякіх прэтэнзій у яго да сына няма.
Але Дзімон правёў трое сутак у ізалятары па 108 артыкуле (падазрэнні ў здзяйсненні злачынства, якія непасрэдна ўзніклі). Можна задаць лагічнае пытанне: навошта? Адказ — да яго двойчы прыходзілі «аператыўнікі», якія прапаноўвалі прызнацца ў тым, што ён скраў магнітолу ў машыне (справа — тыповы вісяк, але, ну, а раптам). Праз 72 гадзіны пайшоў на волю.
Антоха-мінёр
Трохі старэйшы за 20 жыхар Мінска, які прыехаў у Салігорск рабіць «закладкі» ад нейкага наркашопа. Затрымалі разам з напарнікам. Агулам мелі пад 100 грамаў хімічнай субстанцыі. Паспеў атрымаць толькі адзін «заробак». Артыкул 328 частка 3. Пасля затрымання сілавікі праглядалі падпіскі ў Тэлеграме. То-бок чувак ужо, можна лічыць, сядзіць на 8 гадоў, што вы яшчэ хочаце — накінуць яму 15 сутак?
Максім
Гэта мой абсалютны топ, за што можна прысесці. Адчыняюцца дзверы. Заходзіць чалавек і адразу:
— Здаровенька, я Максім — па жыцці мужык.
То-бок, чалавек з яўным турэмным досведам. Пад чай распавядае сваю гісторыю. У яго восьмая ўжо судзімасць. Кажа:
— Я у дзеда кальцо с***дзіў з туалета.
Пакуль мая фантазія малявала сямейную рэліквію з дыяментамі, Макс удакладніў, што гаворка пра «падс*ачнік ад унітаза». Навошта яго скраў, не вельмі памятае, але дзед выклікаў міліцыю і сказаў, што бачыў як той выносіў «падс*ачнік» і прасіў гэтага не рабіць. А гэта ўжо не крадзеж, а грабеж. Праз 72 гадзіны чуваку выдалі пастановы пра ўзбуджэнне справы па артыкуле 206 і аб накіраванні ў жодзінскае СІЗА. За «падс*ачнік». Чувак мае ўсе шанцы стаць на зоне легендай».
Каментары