Як стала вядома «Нашай Ніве», расійскія вярбоўшчыкі заахвочваюць беларускіх будаўнікоў да працы на акупаваных тэрыторыях Украіны. Існуюць маршруты на заробкі ў Марыупаль і Севераданецк.
Замест разбомбленых дамоў там будуюцца новыя — найперш для расійскіх сілавікоў і каланістаў. У прыватнасці, жытло на «новых тэрыторыях» абяцаюць тым крымінальнікам, якіх вярбуюць у турмах для ўдзелу ў вайне супраць Украіны.
«Беларусаў дакладна набіраюць у Севераданецк і Марыупаль. Піцерскія і маскоўскія падрадчыкі дырэктыўна атрымалі загады ўзводзіць там жыллё, а ўзамен — абяцанні атрымаць смачныя кавалкі пад забудову ў расійскіх гарадах», — патлумачыў «Нашай Ніве» ўдзельнік рынку нерухомасці.
«Знайсці рабацяг на гэты кірунак не так проста. У Расіі заўсёды працы было больш, чым людзей для яе — на якую будоўлю не прыедзь, паўсюль працуе Сярэдняя Азія і Беларусь. А ехаць у такім экзатычным кірунку, вядома, дурных мала. Таму набіраюць па ўсёй СНД. З беларусамі ім прасцей за ўсё, бо яны і расіяне — адзіная працоўная прастора, не трэба ніякіх дазволаў на работу, хапае пашпарта», — дадаў наш суразмоўца.
Людзям, якія зарабляюць наборам персаналу ў Мінску, за кожнага прыцягнутага на будоўлю ў Данбас расіяне выплачваюць прэмію, паведамілі «Нашай Ніве» людзі з гэтай сферы.
Заробкі беларускім будаўнікам абяцаюць высокія — да 5 тысяч беларускіх рублёў.
«Але нават на такія заробкі знайсці ахвотных цяжкавата. Ха! Паедзеш і назад не вернешся», — сказаў «Нашай Ніве» будаўнік.
Цяпер чытаюць
Спальныя месцы ў «Мінск-Свеце» могуць выклікаць клаўстрафобію. Як эканомяць прастору ў сучасных кватэрах-студыях9
Каментары