У сваім змаганні з рэальнасцю Кампартыя Беларусі адарвалася ад яе.
Reform.by апублікаваў вытрымкі з ліста камуністаў, якім з імі падзяліліся чытачы. Гэты ліст Кампартыя Беларусі накіравала ў Мінгарвыканкам. Сярод прапаноў — перайменаваць вуліцу Каліноўскага ў Мінску, правесці шэраг мерапрыемстваў у савецкім духу.
Таксама патрабуюць закрыць начныя гей-клубы «Бурлеск» і «Гуллівы хабаток» («Игривый хоботок»), бо «іх каштоўнасныя арыенціры не сумяшчальныя з традыцыйнымі каштоўнасцямі беларускага народа». У лісце пазначаны і адрасы клубаў.
Але рэч у тым, што «Гуллівага хабатка», які так абурыў камуністаў, не існуе.
Адкуль тады ўзнік гэты гей-клуб?
Верагодна, хтосьці з камуністаў заўважыў такую назву на гугл-картах па адрасе вуліца Цэнтральная, 23. Нанеслі яе год таму. Ёсць нават некалькі каментароў, якія нахвальваюць бар.
Аднак на картах у «Яндэксе» такога месца няма. Па згаданым адрасе на фота за 2019 год — звычайны прыватны дом.
А фота, якое стаіць на застаўцы ў гугл-картах, з піцерскага бара «Рэзідэнт».
Хто нанёс клуб на карту, невядома. Але ў 2021 годзе шмат дзіўных перайменаванняў здарылася праз трэнд у тыктоку. Тады беларускія і расійскія падлеткі пачалі прысвойваць школам адвольныя імёны — сапраўдных людзей ці персанажаў гульняў і кіно. Пра адну з такіх школ — «імя Джорна Джавана» — нават расказалі па СТБ, не зразумеўшы, што гэта пранк.
Чытач «Нашай Нівы» для цікавасці пазваніў у Кампартыю Беларусі спытаць, як праз іх перадаць свае прапановы па паляпшэнні горада. Там параілі дасылаць іх на пошту — іх вывучаць, а пасля, калі яны вартыя таго, уключаць у ліст ад імя партыі і дашлюць уладам. Ці будуць правяраць факты, якія напіша грамадзянін?
У прыёмнай сказалі, што дасланую інфармацыю не верыфікуюць — за яе нясе адказнасць грамадзянін, які яе даслаў.
Камуністы прапануюць перайменаваць вуліцу Каліноўскага ў Мінску. Сярод варыянтаў — назваць у гонар Сталіна
Цяпер чытаюць
СК апублікаваў відэазапіс падзення беспілотніка. На абломках паказалі ўкраінскія надпісы22
Каментары