Расіяне развялі беларускага айцішніка, скраўшы ў яго буйны тэлеграм-канал «АйЦіБарада»
Аляксей Картыннік — знакаміты беларускі блогер ад ІТ. У яго папулярны ютуб-канал, ёсць таксама і тэлеграм-канал на 25 тысяч падпісантаў. Але ад сёння там пачала з'яўляцца рэклама махлярскай схемы па выманьванні грошай. Аказваецца, праграміста развялі расіяне і скралі канал.
Сёння ў верыфікаваным тэлеграм-канале «АйЦіБарада» цэлы дзень публікуецца рэклама махлярскай схемы, мэта якой — выманіць з наіўных чытачоў спачатку грошы ў памеры 10 тысяч расійскіх рублёў, а потым — і даныя картак.
Аўтар канала, беларус Аляксей Картыннік, у сваім твітары напісаў, што яго ўзламалі і доступу да 25-тысячнага канала ў яго няма.
Але як развялі гуру ІТ?
«Самым простым спосабам разводу, які існуе дзясяткі год, але я павёўся,
— расказвае Картыннік. — Даслалі ліст на мэйл, адкрыўся тэлеграмаўскі маркетплэйс (ён даўно існуе, але да яго няма доступу ў звычайных карыстальнікаў), можна зайсці рэкламу закупіць. Вельмі прыгожа ліст напісаны, плюс дамен, з якога адпраўлены ліст, таксама са словам «тэлеграм», а я чамусьці палічыў, што часам тэлеграм дасылае з розных даменаў лісты, словам, пайшоў далей.
Не падумаў увогуле, што гэта можа быць скам. Перайшоў па спасылцы, там увёў даныя свайго акаўнта, мне ў тэлеграме (у дадатку) прыляцеў код на ўваход — звычайная працэдура. Я гэты код увёў на той сайт.
А потым мяне папрасілі ўвесці мой код двайной аўтарызацыі. Тут ужо чырвоныя сцяжкі, бо звычайна так не робяць, звычайна гэты код нідзе апроч дадатку ўводзіць не трэба. Ну я і ўвёў, і ўсё — гэта ўсё ўвялі замест мяне з іншага дадатку і ўвайшлі ў мой акаўнт.
Мне прыйшла абвестка, што нехта з Масквы зайшоў у мой акаўнт, але я падумаў, што гэта, напэўна, бот, які адкрывае доступ у рэкламны кабінет і лагініцца праз нейкія расійскія серверы. І сёння мне вось напісалі, што на маім канале посцяць нейкую лухту».
Вядома, з ягонага акаўнта махляры перадалі права адміністраваць канал сабе, а ягоны акаўнт выдалілі.
«Я перарэгістраваў сімку, але доступу ў гэтага акаўнта да каналаў няма. Спрабую вярнуць доступ да канала, не ведаю, ці атрымаецца. З аднаго боку, смешна, што праграміст павёўся на такі стары і папулярны развод. З іншага, шкада, калі нехта з фаловераў павядзецца на тое, што там рэкламуецца.
Але мае падпісанты — разумныя людзі з айцішкі, і зразумеюць, што гэта лабуда», — рэзюмуе ён.
Цяпер чытаюць
«Звяжыцеся з намі»: Пракоп'еў напісаў калонку для «НН», у якой абгрунтоўвае знаходжанне Ціханоўскага ў Штатах і просіць грошай38
«Звяжыцеся з намі»: Пракоп'еў напісаў калонку для «НН», у якой абгрунтоўвае знаходжанне Ціханоўскага ў Штатах і просіць грошай
Галіна Дзербыш казала пракурору: «Як памру, буду да ўсіх вас ноччу прыходзіць». І жыццё ўжо дагнала яе суддзю і сведак. Гісторыя пенсіянеркі, якой далі 20 гадоў калоніі1515
Каментары