Беларуская арнітафаўністычная камісія афіцыйна зацвердзіла і ўключыла ў спіс нашых птушак новыя віды, піша тэлеграм-канал «Дзікая прырода побач».
Арлан-даўгахвост. Дзіўную птушку ўбачыла група птушкароў на рыбгасе Волма 22 жніўня 2021 года, а дома вызначыў па фота Андрэй Барадзін. Каб апынуцца ў Беларусі, гэты малады арлан-даўгахвост павінен быў зрабіць вандроўку даўжынёй прынамсі 5 тысяч км!
Сiняхвостку адлавіў і акальцаваў арнітолаг Дзяніс Кіцель 14 верасня 2021 года на станцыі кальцавання «Сасновы Бор» у Расонскім раёне. Гэтая птушка любіць хваёвыя лясы — калі бываеш там, назірай уважліва за птушкамі, магчыма, і табе пашчасціць убачыць гэты скрытны прыгожы від.
Таўстадзюбую пячураўку таксама адлавіў і акальцаваў Дзяніс Кіцель на станцыі «Сасновы Бор» — усяго праз пару тыдняў пасля сіняхвосткі. Гнездавы арэал гэтай птушкі ад нас далёка: найбліжэйшыя гняздуюць пад Новасібірскам. У Еўропу памылкова ляцяць некаторыя асобіны, таму еўрапейцы радуюцца кожнай такой сустрэчы.
Дэлавэрская чайка ўпершыню адзначаная 26 сакавіка 2022 года ў Брэсцкай і Гомельскай абласцях дзякуючы спадарожнікаваму перадатчыку. А ўжо 31 сакавіка яе знайшлі птушкары ў Гомелі на Валатоўскім возеры. Птушка гняздуе ў Паўночнай Амерыцы, у апошнія дзесяцігоддзі рэгулярна залятае ў Еўропу, а асобныя птушкі нават застаюцца тут на зімоўку.
Арол-шуляк адзначаны 29 і 30 сакавіка ў Смаргонскім раёне дзякуючы спадарожнікаваму перадатчыку. Гэта маладая самка, якая нарадзілася на поўдні Францыі ў 2019 годзе. Від гняздуе ад Маўрытаніі да паўднёва-ўсходняга ўзбярэжжа Кітая.
Такім чынам, цяпер у спісе птушак Беларусі 342 віды.
Цяпер чытаюць
Учора Мінск зноў затапіла. Чаму сталіца не гатовая да дажджоў?4
Каментары