Круцяльство працягваецца, або «Лібералізацыя выбарчага заканадаўства»
Паводле новага выбарчага заканадаўства, апазіцыйны кандыдат зможа вытраціць на кампанію не больш за 70 тыс. даляраў. Піша Барыс Тумар.
Паводле новага выбарчага заканадаўства, апазіцыйны кандыдат зможа вытраціць на кампанію не больш за 70 тыс. даляраў.
Цэнтрвыбаркам прапануе абмежаваць памер індывідуальных фондаў кандыдатаў у прэзідэнты 3000 базавых велічыняў. На сёння гэта 105 мільёнаў рублёў, або менш за 40 тыс. даляраў. У дадатак да індывідуальна сабраных фондаў кандыдаты атрымаюць 2300 базавых велічынь ад дзяржавы. Разам сума не перавысіць 200 мільёнаў рублёў. Такую норму ЦВК прапануе на зацвярджэнне палаты прадстаўнікоў.
Гэта адна з нормаў, якія падаюцца як вялікая саступка лукашэнкаўцаў незалежнаму грамадству і Захаду.
Такім чынам, апазіцыйны кандыдат зможа вытраціць на кампанію не больш за 70 тыс. даляраў.
Гэта мізэрная сума — усяго 20 рублёў на кожнага грамадзяніна Беларусі.За такую суму кандыдат не зможа надрукаваць нават столькі улётак, каб яны трапілі ў кожную паштовую скрынку. Няма чаго і казаць пра тэлевізійную рэкламу. Зрэшты, у «дэмакратычнай Беларусі» тэлебачанні працуюць на аднаго чалавека, дык каб і меў грошы, туды з альтэрнатыўнымі ідэямі не ўсунешся. Дазволеных Ярмошынай грошай забракне нават на арганізацыю агітацыйных аўтакараванаў — традыцыйных спосабаў палітычнай агітацыі ў дэмакратычных краінах, якія і ў Беларусі можна было б ажыццявіць.
Сам Аляксандр Лукашэнка на ўсіх мінулых выбарах распараджаўся сумамі нашмат большага парадку.Ён правёў багаты «Усебеларускі народны сход», арганізаваў дзесяткі агітканцэртаў «За Беларусь». Спецвыпуск «Советской Белоруссіі» трапіў у кожную скрыню. Адзін нумар гэтай газеты каштуе ў 25 разоў болей, чым тыя 20 рублёў, якія Ярмошына дазволіць вытраціць апазіцыі.
Бюджэт аднаго «усебеларускага народнага сходу» будзе большы, чым кошт усёй апазіцыйнай кампаніі.
Знайшла пацверджанне тое, у чым і так ніхто не сумняваўся. Новыя нормы задуманыя Лукашэнкам і прызначанай ім Ярмошынай такім чынам, каб ніяк не парушылася іхная манаполія на ўладу, устаноўленая імі ў парушэнне Канстытуцыі.
Апазіцыя канечне павінна выкарыстоўваць выбарчую кампанію для палітычнай агітацыі. Але трэба рабіць гэта па ўласным сцэнары, а не падыгрываючы ў шоў, мэта якога — легітымізацыя самадзяржаўя.
Цяпер чытаюць
Былы галоўны ідэолаг Беларусі прадаў дом у Драздах за $600 тысяч3
Каментары