Аўтарка вядомага дапаможніка па «расхламленні жыцця» больш не падтрымлівае ідэальную чысціню
Мары Конда, кансультант па ўборцы і аўтарка бестселера «Магія ўборкі, якая змяняе жыццё», пераканала і паказала тысячам людзей, як навесці дома парадак. Аднак цяпер усё змянілася. Мары кажа, што яе дом ужо не такі ахайны.
Мары таксама маці траіх дзяцей.
«У мяне дома беспарадак, але тое, як я баўлю час, здаецца мне правільным у гэты перыяд жыцця […] Да гэтага часу я была прафесіяналам ва ўборцы і рабіла ўсё магчымае, каб заўсёды падтрымліваць парадак дома […] Цяпер я адмовілася ад гэтай ідэі ў добрым сэнсе. Для мяне больш важна бавіць час з дзецьмі», — сказала спадарыня Конда ў інтэрв’ю The Washington Post.
Некаторыя людзі падзяліліся сваёй рэакцыяй у сацыяльных сетках і адрэагавалі станоўча, бо нарэшце пачулі парады японскай кансультанткі, якія набліжаныя да рэальнага жыцця.
«Той факт, што Мары Конда, лідар міленіялаў, якіх яна вучыла захоўваць толькі тыя рэчы, што выклікаюць радасць, перастала наводзіць парадак у сваім доме цяпер, калі ў яе трое дзяцей, сапраўды мяне павесяліў», — напісаў адзін з карыстальнікаў твітара.
«Прачытаўшы, я адчула палёгку і нармальнасць свайго ладу жыцця. У мяне трое дзяцей і я спрабавала метад КонМары кожныя тры месяцы, але гэта проста неажыццяўляльна. Вядома, расхламленне патрабуе ШМАТ ЧАСУ, але трымаць свой дом у чысціні, як у каталогу IKEA? Гэта фізічна немагчыма з трыма дзецьмі», — напісала яшчэ адна карыстальніца.
Для Конда, якая кажа, што яе філасофія прыбірання часткова заснаваная на сінтаізме карэнных японцаў, падтрыманне парадку ў доме — гэта толькі частка практыкі, піша NPR.
Па словах жанчыны, «канчатковая мэта — выпраменьваць радасць штодзень і жыць у радасці». Мары апісвае гэтую філасофію як курашы, што, паводле яе слоў, прыкладна можна перакласці з японскай мовы як «лад жыцця».
Трэба сказаць, што пазбаўленне ад хламу — гэта не столькі тэндэнцыя, колькі неабходнасць для многіх гараджан у Японіі і іншых частках Азіі, дзе кватэры першапачаткова маленькія.
Згодна з даследаваннем жылля і зямель, праведзеным японскім урадам у 2019 годзе, сярэдні памер дома ў Токіа крыху большы за 65 квадратных метраў. Гэта прыкладна столькі ж, як і сярэдні памер кватэры.
Конда, чые арганізатарскія здольнасці дазволілі ёй стаць гераіняй двух серыялаў на Netflix, і раней сутыкалася з негатыўнай рэакцыяй, у тым ліку за тое, што адлюстроўвала акуратнасць як нешта выключна японскае, а таксама за тое, што раіла захоўваць не больш за 30 кніг (апошняе, паводле яе слоў, было памылкай).
У сваёй першай кнізе, якая была апублікаваная ў 2010 годзе, Мары сцвярджала, што рэзкая рэарганізацыя «выклікае, адпаведна, кардынальныя змены ў ладзе жыцця і поглядах».
«Сапраўдная мэта навядзення парадку не ў тым, каб скараціць колькасць вашых рэчаў ці расчысціць прастору», — кажа Конда. А хутчэй — навучыцца рабіць асэнсаваны выбар і знаходзіць задаволенасць у паўсядзённым жыцці.
Каментары