Аўстралія прыбярэ з грошай Лізавету ІІ, а Карла ІІІ змяшчаць не будзе
Рэзервовы банк Аўстраліі прыняў рашэнне аб тым, што замест партрэта новага брытанскага манарха, які ўжо з'явіўся на брытанскіх пластыкавых купюрах, на банкноце ў 5 даляраў з'явіцца малюнак, «які адлюстроўвае культуру і гісторыю аўстралійскіх абарыгенаў».
Што наконт гэтага рашэння думае сам Карл ІІІ, пакуль невядома. Але наўрад ці яго асабістая думка тут нешта зменіць.
Аўстралія, хоць даўно з'яўляецца цалкам незалежнай ад Вялікабрытаніі, дзяржавай, захавала ў якасці фармальнага кіраўніка брытанскага манарха, які прадстаўлены ў краіне генерал-губернатарам. Аднак улада гэтага манарха чыста сімвалічная, сапраўды кіраўнік краіны — прэм'ер-міністр, на прызначэнне якога кароль не мае ніякага ўплыву.
Увогуле, пасля змены фігуры на брытанскім троне многія чакаюць таго, што дзяржавы брытанскай Садружнасці, дзе аналагічна з Аўстраліяй брытанскі манарх застаецца сімвалічным кіраўніком дзяржавы, будуць адмаўляцца ад гэтага стану. Некаторыя так рабілі і раней (апошні выпадак — Барбадас, які памяняў каралеву на прэзідэнта ў лістападзе 2021 года), але большасць захоўвалі традыцыю ў значнай ступені з павагі да самой Лізаветы ІІ. Яе наступнік такім аўтарытэтам ужо не карыстаецца.
Зрэшты, аблічча Лізаветы II кашалькі аўстралійцаў не пакіне яшчэ доўга. Бо, як паведамілі ў банку Аўстраліі, на распрацоўку дызайну і выпуск новай пяцідаляравай банкноты будзе выдаткавана некалькі гадоў. І ўвесь гэты час у абарачэнне з запасаў банка працягнуць сыходзіць купюры цяперашняга фармату. Акрамя таго, нават пасля ўводу новай банкноты старыя грошы з каралевай працягнуць заставацца законным плацежным сродкам і будуць выводзіцца з абарачэння паступова.
Апрача ўласна Аўстраліі, аўстралійскі даляр з'яўляецца сродкам разліку таксама ў дробных астраўных ціхаакіянскіх дзяржавах Кірыбаці, Науру і Тувалу.
Каментары