«Гэта гістарычнае права Расіі — быць моцнай». Пуцін выступіў з пасланнем
Сёння Уладзімір Пуцін звярнуўся з пасланнем да Федэральнага сходу. Ён паўтарыў свае леташнія заявы аб праве Расіі далучаць іншыя дзяржавы і тэрыторыі, якія Масква лічыць «гістарычна расійскімі». Прагучала шмат папулізму і хлусні, а няўдачы на фронце засталіся замоўчанымі. Пуцін таксама заявіў, што Расія прыпыняе ўдзел у Дамове аб скарачэнні і абмежаванні стратэгічных наступальных узбраенняў паміж Расіяй і ЗША.
У сваім пасланні Пуцін абвінаваціў Захад і Украіну ў пачатку вайны, якую насамрэч пачала Расія.
«Да лютага 2022 года ўсё было гатова да чарговай крывавай карнай аперацыі на Данбасе», — сказаў ён.
«Гэта яны развязалі вайну. А мы выкарыстоўваем сілу, каб яе спыніць», — хлусліва заявіў Пуцін.
Кажучы пра Украіну, ён паскардзіўся, што Захад з XIX стагоддзя спрабуе «адарваць гэтыя гістарычныя тэрыторыі ад іх краіны».
Пуцін пакрытыкаваў расійскіх бізнэсменаў, што ўкладалі грошы ў заходнія тэхналогіі і заходнія рынкі.
«У расійскіх бізнэсоўцаў ёсць выбар — жыць з арыштаванымі рахункамі на Захадзе ці быць са сваёй краінай, развіваць яе эканоміку. <…> Цяпер не варта спрабаваць нешта адсудзіць. Вы моцныя людзі, якія прайшлі моцную школу — укладвайце ў Расію, дапамагайце школам і ўніверсітэтам. Так заслужыце зычлівасць людзей», — прапанаваў ён «загладзіць грахі».
«У справе абароны Расіі мы ўсе павінны аб'яднаць, узгадніць свае высілкі і абавязкі і правы для падтрымання аднаго гістарычнага найвышэйшага права — права Расіі быць моцнай», — Пуцін пад авацыю залы працытаваў Пятра Сталыпіна.
Агулам зала апладзіравала Пуціну 53 разы, у тым ліку чатыры разы — стоячы.
На працягу прамовы Пуцін супакойваў, што эканоміка насуперак усяму выстаяла і развіваецца — ВУП упаў усяго на 2,1 працэнта ў мінулым годзе, гэта было паўторана тройчы і падавалася як вялікае дасягненне — і не згадваў пра няўдачы расійскай арміі на фронце.
Пад самы канец звароту ён заявіў, што Расія прыпыняе ўдзел у Дамове аб скарачэнні і абмежаванні стратэгічных наступальных узбраенняў паміж Расіяй і ЗША. Гэты дакумент абмяжоўваў колькасць ядзерных боезарадаў з кожнага боку да 1550, а лік міжкантынентальных балістычных ракет, балістычных ракет на падводных лодках і цяжкіх бамбавіках — да 700. Дамова была падпісаная ў 2010 годзе і была вялікім здабыткам доўгага перыяду напружання ў міжнародных адносінах. Першыя перамовы аб абмежаванні ядзерных узбраенняў пачаліся яшчэ ў 1970-х паміж Ніксанам і Брэжневым, сапраўдная разрадка пачалася ў канцы 1980-х. А цяпер свет скаціўся да новага супрацьстаяння.
Цяпер чытаюць
Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы11
Каментары