Калі для нас буслы — сімвал міру і шчасця і мы нецярпліва чакаем іх вясной, то ў іншых частках свету яны аб'ект забавы самага нізкага ўзроўню, піша Gazeta.pl. Браканьеры ў Ліване накіроўваюць зброю ў неба кожны раз, калі бачаць у ім буслоў.
Пра гэтую ганебную практыку, папулярную у гэтай невялікай блізкаўсходняй краіне, паведамляе Камітэт супраць забівання птушак (CABS), які адсочвае незаконны адстрэл буслоў.
«Цяжка паверыць, але буслоў, якія спрабуюць вярнуцца на месца гнездавання, у Ліване масава адстрэльваюць браканьеры», — напісана на старонцы арганізацыі ў фэйсбуку.
У Ліване да адстрэлу буслоў ставяцца як да забавы. Ліванскія сілы бяспекі арыштавалі аднаго чалавека пасля таго, як актывісты ўбачылі, як група браканьераў страляла ў чараду з каля 500 буслоў. Было яшчэ шмат падобных інцыдэнтаў, расследаванне працягваецца.
Бернард Абі Надэр, ветэрынар, які падрыхтаваў справаздачу аб сітуацыі з мігруючымі птушкамі ў Ліване для Камітэта супраць забівання птушак (CABS), патлумачыў у інтэрвʼю, апублікаваным на сайце bociany.pl, што птушак забіваюць не для спажывання.
«Іх забіваюць паляўнічыя-аматары, якія вельмі маладыя і не маюць ведаў аб паляванні. Яны лічаць паляванне забаўкай, гульнёй (…).
Паляванне — частка ліванскай культуры, але часцей за ўсё самым вялікім поспехам яны лічаць адстрэл птушак, якія ахоўваюцца. Аднак гэта прыводзіць да канфлікту паміж эколагамі і паляўнічымі», — растлумачыў ветэрынар.
Бернард Абі Надэр растлумачыў, што хоць паляванне на буслоў у Ліване забаронена з 2004 года, забарона не выконваецца. «Людзі не паважаюць і недаацэньваюць гэтых птушак», — падкрэсліў ліванец.
Цяпер чытаюць
За палітыку асудзілі шматдзетнага бацьку-верніка. Яго жонка памерла два гады таму6
Каментары