Нататка пра цікавы гістарычны конкурс і анонс выставы-экскурсіі ў яго межах.
У Віцебску праходзіць конкурс гісторыка-культурных інтэрпрэтацый гораду і яго ваколіц.
Арганізатары ў асобах Віцебскага абласнога краязнаўчага музея і культурніцкага партала Vitebsk4.me прапанавалі маладым людзям паразважаць над тым, якіх помнікаў не хапае роднаму гораду, памяць пра якія падзеі варта адлюстраваць на яго вуліцах, якія гістарычна і мастацка важныя мясціны Віцебску і ваколіц дагэтуль ніяк не адзначаныя, якія ландшафты патрабуюць аднаўлення альбо пераасэнсавання. Па ўмовах конкурсу аб’ектамі інтэрпрэтацый, дасланых у тэкставым выглядзе, могуць стацца як рэальныя героі і падзеі, так і выразна міфічныя феномены віцебскай даўніны. Удзельнікі могуць спраецыраваць «памяць пра прошлае» на сённяшні дзень і прэзентаваць свае варыянты інтэрпрэтацыі цяперашняга віцебскага ландшафту. Спосабы аднаўлення памяці таксама не абмяжоўваюцца: музеі, гарадскія святы, галерэі, віртуальныя экскурсіі, ролевыя гульні, мемарыялы — як паасобку, так і комплексна. Адзінае, што трэба абгрунтаваць у абавязковым парадку — чаму менавіта гэтая памяць мусіць быць рэанімінаваная ў свядомасці гараджан.
Для больш дэталёвага знаёмства з умовамі конкурсу, а таксама з матэрыяламі, якія могуць стацца крыніцай натхнення для будучай інтэрпрэтацыі, у сеціве запрацавала адмысловая старонка.
Акрамя таго, у межах конкурсу 27 лістапада ў віцебскім цэнтры рамёстваў «Задзвінне» адкрыецца краязнаўчая выстава, якая распавядзе пра значныя аб’екты ў віцебскіх ваколіцах. Чаму лес каля пасёлка Лужасна называюць «цёплым» і чаму маёнтак «Мілае» — самы рамантычны на Беларусі, чым адметная гісторыя каменнага крыжа ў вёсцы Хабаты і чаму там захавалася адзіная «дакастрычніцкая» царква на Гарадоччыне, чаму жыхары ўзбярэжжа возера Лосвіда памятаюць Напалеона і які лёс перажыла адзіная захаваная ў Віцебскім раёне царква‑»мураўёўка»? Выбітны падзвінскі краязнаўца, цудоўны прамоўца, кандыдат гістарычных навук Мікола Півавар правядзе з дапамогай экспазіцыі віртуальную экскурсію па гэтых і шмат якіх іншых прыцягальных пунктах віцебскага наваколля.
Мікола Бугай: Трэба перагарнуць старонку 2020-га і пачаць жыць новымі рэаліямі64
Каментары