Польскія перавозчыкі пачалі блакаду ўкраінскай мяжы. Яны патрабуюць вярнуць умовы працы ўкраінскіх калег да даваенных
Польскія перавозчыкі пачалі блакаваць тры пагранічныя пераходы з Украінай. Галоўнае патрабаванне іх — вяртанне сістэмы выдачы дазволаў для працы ў ЕС украінскіх перавозчыкаў.
Удзельнікі блакады патрабуюць увядзення камерцыйных дазволаў для ўкраінскіх перавозчыкаў і скарачэння іх колькасці да ўзроўню, які існаваў да расійскага ўварвання ва Украіну.
Кіроўцаў легкавых аўтамабіляў, аўтобусаў і транспартных сродкаў, якія перавозяць жывых жывёл, а таксама гуманітарную і ваенную дапамогу, абяцаюць прапускаць.
У Дзяржпагранслужбе Украіны папярэдзілі пра магчымае ўскладненне руху як на ўезд у Польшчу, так і на выезд.
«Арганізатары пратэсту плануюць прапускаць па адным грузавым аўтамабілі за гадзіну, а таксама грузавыя аўтамабілі з грузамі бяспекі, гуманітарнага характару, тыя, якія перавозяць жывёл, прадукты, што хутка псуюцца і г.д.», — гаворыцца ў паведамленні.
Пасля пачатку поўнамаштабнай вайны з РФ Еўрасаюз пайшоў на беспрэцэдэнтныя крокі для падтрымкі ўкраінскай эканомікі і на год адмяніў неабходнасць атрымання ўкраінцамі дазволаў. А ўлетку гэтага года ЕС падоўжыў дзеянне гэтай нормы да чэрвеня 2024 года.
Цяпер польскія перавозчыкі патрабуюць адмяніць гэтую льготу ў прынцыпе і вярнуць старую дазвольную сістэму.
Цяпер чытаюць
Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача14
Каментары