Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача
На польскім дабрачынным рэсурсе Siepomaga з'явіўся збор на карысць беларуса Канстанціна Каліноўскага (Чыслава), які «адважна змагаўся за вольнасць іншых, а сёння сам патрабуе дапамогі». На аперацыю для рэабілітацыі сустава трэба амаль 69 тысяч рублёў, сабрана троху больш за палову. Толькі ёсць нюансы. Каб атрымаць грошы, беларус выдумаў сваю гісторыю.
«Косця — гэта хлопец з Беларусі, які быў вымушаны пакінуць Айчыну з палітычных прычын, выехаў ва Украіну, дзе спрабаваў пачаць усё спачатку. Калі выбухла вайна, не вагаўся ні хвіліны. Уступіў у шэрагі УСУ і стаў на абарону краю, які даў яму дом і другі шанец. Пазней лёс выштурхнуў Косцю да Польшчы. Тут ён падаў прашэнне аб міжнароднай ахове і стаў працаваць на будоўлі, каб мець магчымасць самастойна сябе ўтрымліваць», — так гаворыцца ў апісанні збору на карысць Канстанціна Каліноўскага, сына Сяргея Чыслава (Бульбы).
Грошы патрэбны для рэабілітацыі пасля падзення з вышыні, а таксама для яшчэ адной аперацыі на руцэ.
Збор праводзіцца ад імя «сяброў Косці», медыцынскія дакументы ў пацвярджэнне гісторыі не прыкладзеныя. На беларускіх краўдфандынгавых пляцоўках гэты збор не размяшчаўся. Чаму?
Магчыма, таму што такое гераічнае выкладанне ў рэальнасці зусім не гераічнай біяграфіі сына Чыслава моцна засмуціць беларускага чытача і беларускіх добраахвотнікаў. Адзін з іх акурат і скінуў збор у «Нашу Ніву», суправадзіўшы яго цынічным нецэнзурным каментаром.
Што ж там не так?
Высвятляецца, на момант пачатку вайны Чыслаў-малодшы сапраўды знаходзіўся на тэрыторыі Украіны і выказаў жаданне далучыцца да «Азова», на базе якога потым узнік Полк Каліноўскага. Казаў, што ён палітычны актывіст з Беларусі.
Ён знаходзіўся на трэніровачнай базе роўна да моманту, пакуль прыйшла выпіска на яго ад «Кіберпартызанаў». З яе стала вядома, што Канстанцін Каліноўскі сапраўды меў праблемы з законам, але зусім не праз палітыку.
У 2015 годзе мінакі выклікалі хуткую чалавеку ля пад'езда, які быў пад кайфам. У шпіталі хуткай дапамогі ў яго пры сабе знайшлі наркотыкі Альфа-РVР і выклікалі міліцыю — Чыслава-малодшага асудзілі на 3 гады калоніі.
У 2020‑м ні паводле адміністрацыйных, ні крымінальных спраў Каліноўскага, як вынікае з баз, не затрымлівалі — яго імя ў базах «Кіберпартызан» не мае тэга «Беспарадкі», які ставіўся ўсім, каго судзілі праз палітыку. Пра ягоны пераслед не паведамлялі і праваабаронцы.
Аднак у маі 2021 года Канстанціна ўсё ж затрымалі — зноў з наркотыкамі, цяпер з мефедронам. Зноў завялі крымінальную справу. Праўда, па ёй Чыслаў-малодшы не сеў, а, будучы фігурантам, неяк апынуўся ва Украіне — гэтыя цмяныя падрабязнасці, а таксама прыхоўванне фактаў біяграфіі і паставілі кропку на баявой кар'еры.
Чыславу адмовілі ў прыняцці ў Полк Каліноўскага. Ён не ўдзельнічаў у баявых дзеяннях. Неўзабаве ён з'ехаў у Польшчу і атрымаў забарону на ўезд ва Украіну.
Значна пазней — ужо ў жніўні 2023-га, у адным з памыйных міліцэйскіх тэлеграм-каналаў апублікавалі відэа з Канстанцінам. Імаверна, запіс быў зроблены падчас таго самага затрымання ў маі 2021-га.
На відэа хлопец у кайданках, седзячы ў кабінеце ўпраўлення наркакантролю, у відавочна змененым стане свядомасці адказвае на пытанні аператыўніка: «ужываў «сабаку», «гэта Альфа PvP», «ужываю ін'екцыйна», «не скажу, што асабліва мітынгаваў у 2020-м».
Пры гэтым цяпер Чыслаў працягвае расказваць выдуманыя падрабязнасці ў медыя з мэтай збору.
Так, «Радыё Свабода» ён расказваў, што выходзіў на пратэсты ў 2020, быў затрыманы і тры месяцы прасядзеў у СІЗА, але ніякіх дакументаў не захаваў. Ён даводзіць, што нібыта з'ехаў з Беларусі ў пачатку 2021 года (хоць напраўду ў маі 2021 года быў затрыманы з наркотыкамі), а таксама што ён два месяцы быў у Палку Каліноўскага і сышоў праз канфлікт са штабам. Выглядае, што ўсё пералічанае — хлусня.
«Наша Ніва» звярнулася да Чыслава-Каліноўскага з просьбай падрабязней расказаць пра характар атрыманых траўм, падаць дакументы, а таксама больш расказаць пра ўдзел у баявых дзеяннях і палітычным жыцці.
Канстанцін цягнуў з адказамі, а потым напісаў так: «Калі збяру поўную інфармацыю, тады і адпішуся. Спрабую высветліць канкрэтную прычыну падачы мяне ў спісы Інтэрпола ў 2023 годзе і падаць усю інфармацыю».
Сяргей Бульба (ранейшае прозвішча — Чыслаў) — былы вайсковец, у 1990‑я быў адным з лідараў «Белага легіёна». Адказваў за ахову Віктара Ганчара. У 2010‑х жыў ва Украіне, узначальваў шэраг фондаў. Пасля пачатку вайны перабраўся ў Польшчу, стварыў фонды і там. Стаў фігурантам скандалу з «Беларускім моладзевым хабам».
«Наша Нiва» — бастыён беларушчыны
ПАДТРЫМАЦЬЦяпер чытаюць
Вялікая гутарка з Лесяй Руднік пра сэксізм, мужа-рэслера, заробак доктаркі навук у Швецыі, апазіцыю і памылку Еўрасаюза25
Каментары