Навукоўцы прагледзелі даныя 25 розных даследаванняў і выявілі відавочную сувязь паміж уздзеяннем двух класаў інсектыцыдаў і ніжэйшай канцэнтрацыяй спермы.
Новыя даследаванні паказваюць, што вайна чалавецтва супраць насякомых мела непрадбачаныя наступствы: зніжэнне колькасці спермы. Усё пачалося з таго, што некалькі папярэдніх даследаванняў паказалі няўхільнае зніжэнне сярэдняй колькасці спермы ў мужчын на працягу апошніх пяцідзесяці гадоў, што асабліва відавочна праявілася з пачатку 2000-х.
Навукоўцы выказвалі здагадкі аб магчымых прычынах гэтай з’явы ва ўсім свеце: ад павелічэння ўзроўню атлусцення да большага ўздзеяння таксінаў з навакольнага асяроддзя, у тым ліку і інсектыцыдаў (хімічных прэпаратаў, прызначаных для знішчэння насякомых). Даследчыкі з George Washington University, George Mason University і Italy’s Ramazzini Institute хацелі лепш зразумець якраз тыя даныя, што звязваюць інсектыцыды з колькасцю спермы.
Каманда прааналізавала 25 розных даследаванняў, якія праводзіліся на працягу апошніх 25 з лішнім гадоў. У даследаваннях разглядалася ўздзеянне на мужчын двух класаў інсектыцыдаў, якія шырока выкарыстоўваюцца: арганафасфатаў і N-метыл карбаматаў. У тых даследаваннях ва ўдзельнікаў сярод іншага вымяралася канцэнтрацыя спермы (канцэнтрацыю спермы можна выкарыстоўваць для разліку агульнай колькасці спермы, тлумачыць Gizmodo).
У выніку даследчыкі ўбачылі выразны шаблон нават пасля ўліку іншых магчымых фактараў: павелічэнне ўздзеяння гэтых інсектыцыдаў было звязана са зніжэннем канцэнтрацыі спермы.
Аўтары кажуць, што іх праца, апублікаваная ў часопісе Environmental Health Perspectives, з'яўляецца найбольш поўным сістэматычным аглядам па гэтай тэме на сённяшні дзень. Але, як і ва ўсіх даследаваннях, трэба ўлічваць некаторыя нюансы.
Важна адзначыць, што тут паказаная толькі сама карэляцыя (статыстычная ўзаемасувязь) паміж уздзеяннем інсектыцыдаў і колькасцю спермы, але не прадэманстравана выразная прычынна-выніковая сувязь. Многія з даследаванняў таксама былі крос-секцыйнымі — гэта азначае, што яны вывучалі людзей толькі ў адзін момант часу. Таксама дагэтуль вядуцца спрэчкі наконт таго, ці сапраўды колькасць спермы знізілася з цягам часу, і ці паўплывала такое зніжэнне на фертыльнасць мужчын у цэлым. Нарэшце, даследаванне не можа адказаць, як менавіта інсектыцыды могуць пашкоджваць сперму.
Пры гэтым і іншыя даследаванні пацвярджаюць прычынную сувязь паміж інсектыцыдамі і спермай. У прыватнасці, існуе нядаўні метааналіз, які звязвае зніжэнне колькасці спермы з уздзеяннем арганафасфатаў. А даследаванні на жывёлах паказалі, што гэтыя хімічныя рэчывы могуць непасрэдна ўмешвацца ў працу рэцэптараў гармонаў, ключавых для фертыльнасці самцоў.
Аўтары кажуць, што трэба праводзіць дадатковыя даследаванні, каб лепш зразумець дакладную ролю, якую інсектыцыды могуць адыгрываць у зніжэнні колькасці спермы. Гэтыя даследаванні ў ідэале павінны актыўна адсочваць уздзеянне інсектыцыдаў і якасць спермы ў мужчын на працягу доўгага часу ў так званым «праспектыўным кагортным даследаванні». Але згодна з аўтарамі, атрыманых даных ужо дастаткова для ўрадаў, каб пачаць прымаць неадкладныя меры па абмежаванні калектыўнага ўздзеяння інсектыцыдаў на навакольнае асяроддзе і чалавека.
Глыбока ў лёгкіх жывых людзей знайшлі часцінкі пластыку. Невядома, як гэта ўплывае на здароўе
«Экалагічна чыстыя» саломінкі ўтрымліваюць патэнцыйна таксічныя хімічныя рэчывы, якія ўяўляюць пагрозу для людзей і дзікай прыроды
Звычайнае рэчыва для хімчысткі можа быць прычынай хваробы Паркінсана, кажуць навукоўцы
Амерыканцы дабіліся вызвалення Юрыя Зянковіча. Ён быў прысуджаны да 11 гадоў зняволення18
Каментары