Кантактная група Рады Еўропы па Беларусі вызначылася, чым будзе займацца наступныя два гады
Кантактная група па супрацоўніцтве з прадстаўнікамі беларускіх дэмакратычных сіл і грамадзянскай супольнасці па выніках пасяджэння 1 снежня ў Страсбуры склала папярэдні план мерапрыемстваў на 2024-2025 гады.
Пра гэта паведамляе выданне «Позірк».
Як паведаміла дарадца Святланы Ціханоўскай па моладзевай палітыцы і справах студэнтаў Маргарыта Ворыхава, запланаваныя мерапрыемствы «ахопліваюць розныя галіны».
«У сукупнасці яны накіраваныя на пашырэнне правоў і магчымасцяў беларускай грамадзянскай супольнасці, юрыстаў, журналістаў і моладзі шляхам прадастаўлення ведаў, навыкаў і падтрымкі пры прапагандзе правоў чалавека, дэмакратычных каштоўнасцяў і рэформаў кіравання ў Беларусі», — адзначыла дарадца Ціханоўскай.
Усяго, паводле яе слоў, у плане пяць раздзелаў і 11 пунктаў.
Ворыхава падкрэсліла, што план «актыўнасцяў» кантактнай групы найбліжэйшымі тыднямі будзе дапрацоўвацца. Яго зацвярджэнне чакаецца не пазней за 24 студзеня.
Кантактная група Рады Еўропы па Беларусі дзейнічае з лістапада 2022 года. З беларускага боку туды ўваходзяць прадстаўнікі дэмакратычных сіл і грамадзянскай супольнасці.
У кастрычніку гэтага года Рада Еўропы дала дэмакратычным сілам асобны офіс у сваім будынку ў Страсбуры.
Каментары