Гродзенцы патрабуюць растлумачыць, куды знікла мемарыяльная дошка Тадэвуша Касцюшкі
З Новага замка ў Гродне днямі знялі памятную дошку, прысвечаную нацыянальнаму герою Беларусі. Абураныя жыхары горада ў адказ размясцілі на сайце Petitions.by зварот у Гродзенскі гарвыканкам, піша Budzma.org.
«Патрабуем растлумачыць, куды падзелася памятная дошка Тадэвуша Касцюшкі на Новым замку ў Гродне, а таксама ў найкарацейшыя тэрміны вярнуць яе на месца», — пішуць аўтары петыцыі.
Драўляная шыльда на сцяне Новага замка была ўсталяваная ў 1994 годзе, да 200-годдзя паўстання. Знялі яе ў красавіку 2024 — праз трыццаць гадоў.
У верасні 1794 года ў замку працавала Паўстанцкая парадкавая камісія, у якой браў удзел і Тадэвуш Касцюшка. Гарадзенцы адзначылі, што гэты візіт — важны момант у гісторыі Новага замка, пра які згадвае кожны экскурсавод. Дзякуючы памятнай дошцы пра гэты факт можна было даведацца самастойна.
«Мы лічым, што дэмантаж дошкі негатыўна ўплывае на турыстычны патэнцыял Гродна, абядняе нашую гісторыю, ідзе ў разрэз з прынятымі канцэпцыямі развіцця турызму і гасціннасці Беларусі,» — напісалі аўтары зварота.
Подпісы збіраюць да 8 мая 2024 года.
Памяць пра Тадэвуша Касцюшку здаўна шануецца і захоўваецца жыхарамі Гродна, адзначылі аўтары петыцыі. Вуліца Касцюшкі існуе ў горадзе каля 100 гадоў, а ў Кафедральным саборы Францыска Ксаверыя размешчаныя дзве памятныя дошкі. Адна шыльда з надпісам на польскай мове была пастаўлена ў 1917 годзе да 100-годдзя з дня смерці дзеяча. Другая — у 2017 годзе, ужо да 200-годдзя з дня яго смерці. Яна зробленая з адмысловага шкла і мае надпісы на беларускай, польскай і англійскай мовах: «1817—2017. Тадэвушу Касцюшку — удзячныя нашчадкі».
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі26
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4242
Каментары