«Гэта сапраўдная сенсацыя». Пры раскопках на Менцы знайшлі зааморфную фігуру, якой 1000 гадоў
Цяпер ідзе кансервацыя драўляных клецяў, знойдзеных на раскопках гарадзішча на Менцы, расказаў расійскаму выданню Sputnik загадчык аддзела археалогіі Сярэдніх вякоў і Новага часу Інстытута гісторыі НАН Андрэй Вайцяховіч.
Усе драўляныя канструкцыі, якія знаходзіліся ў аснове вала гарадзішча на Менцы і прызначаныя для кансервацыі, дастаўленыя на вытворчую базу гомельскага прадпрыемства «Транс-цэнтр».
Па словах навукоўца, спецыялісты па кансервацыі дрэва прасілі не мыць драўляныя канструкцыі перад адпраўкай, каб захаваць іх у цэласнасці.
«Сёння спецыялісты ў Гомелі пачалі адмываць часткі драўляных клецяў і выявілі зааморфную фігуру — гэта можа быць цмок або іншая жывёла, у якой ёсць дзюба», — расказаў Андрэй Вайцяховіч.
Пры гэтым ён удакладніў, што тысячу гадоў таму, калі ўзводзіўся вал гарадзішча на Менцы, гэтая фігура была засыпаная зямлёй разам з клецямі і не была бачная людзям.
Археолаг звярнуў увагу, што гэта спецыяльная частка канструкцыі, якая як крук падпірала знешнюю сцяну клецяў. Такіх драўляных частак было вынята некалькі.
У адказ на пытанне, навошта чалавек тысячу гадоў таму мог так старанна ўпрыгожваць разьбяным дэкорам бервяно, якое ніхто не ўбачыць, гісторык выказаў здагадку, што гэта магло быць звязана з паганскім уяўленнем пра свет ці гэта была частка традыцыйнага дэкору.
Акрамя таго, ён звярнуў асаблівую ўвагу, што драўляныя зааморфныя фігуры, якім больш за тысячу гадоў, падобнай захаванасці ў нашым рэгіёне наўрад ці можна знайсці.
«Гэта сапраўдная сенсацыя», — рэзюмаваў Андрэй Вайцяховіч.
Каментары