«Германія ўжо падводзіла свет да прорвы. Канцлер Шольц, не дайце гэтаму паўтарыцца». Каспараў выкупіў старонку ў найбольшым нямецкім выданні
13-ы чэмпіён свету па шахматах выкупіў у Bild цэлую старонку рэкламы, размясціўшы на ёй фатаграфію магіл украінскіх вайскоўцаў і заклік да канцлера Германіі Олафа Шольца даць Украіне неабходную для яе ваенную дапамогу.
«Германія ўжо падводзіла свет да прорвы. Канцлер Шольц, не дайце гэтаму паўтарыцца. Дайце Украіне тую вайсковую дапамогу, у якой яна сапраўды мае патрэбу», — такі надпіс размешчаны пад фатаграфіяй, піша Расійская служба Радыё Свабода.
Абвестка апублікаваная на фоне абмеркавання магчымай пастановы ўрада Германіі скараціць вайсковую дапамогу Украіне.
Міністр фінансаў ФРГ Крысціян Лінднер ужо накіраваў міністру абароны Барысу Пісторыусу ліст з просьбай не ўхваляць далейшыя заказы на куплю ўзбраенняў у прамысловых прадпрыемстваў, сцвярджаецца ў матэрыяле Frankfurter Allgemeine Sonntagszeitung.
Гары Каспараў у 2005 годзе абвясціў пра завяршэнне шахматнай кар'еры, пасля чаго заняўся палітычнай дзейнасцю ў Расіі. У 2013 годзе з'ехаў з Расіі, баючыся пераследу з боку ўладаў. Знаходзячыся за мяжой, былы шахматыст заснаваў апазіцыйны Форум свабоднай Расіі, а пасля пачатку вайны ва Украіне стаў адным з заснавальнікам Антываеннага камітэта Расіі.
Bild — найбуйнейшая нямецкая ілюстраваная газета з накладам звыш мільёна асобнікаў. У электронным выглядзе яе чытаюць звыш 20 мільёнаў чалавек у дзень.
Цяпер чытаюць
«ЗША хочуць нармалізацыі літоўска-беларускіх адносін. Адсюль і рухі з офісам Ціханоўскай»9
Каментары
Хай яшчэ Гары пацікавіцца, як зелень у Бундэстаге скарочвае выдаткі на ўласную армію. Адкуль грошы браць? Яшчэ больш фінансаванне Бундэсвера скараціць? Ці цёткам з Украіны перастаць грошы на б'юты-індустрыю выдаткоўваць? А, Гары?