Жыхароў расійскіх рэгіёнаў масава выстройвалі ў надпісы ў гонар 72‑годдзя Пуціна
У Расіі прайшлі мерапрыемствы, прысвечаныя дню нараджэння прэзідэнта Уладзіміра Пуціна, якое прыпадае на 7 кастрычніка. У іх рамках людзей зганялі на плошчы і выстройвалі ў прынагодныя словы і фігуры. Самыя маштабныя акцыі прайшлі ў Маскве і Пецярбургу, піша The Moscow Times.
У Маскве для віншавання Пуціна актывісты «Маладой гвардыі Адзінай Расіі» задзейнічалі 5 тысяч чалавек, якія выстраіліся ў надпіс «С Днём Рождения, президент» на ВДНГ.
Вызначылася і партыя «Адзіная Расія». Яе члены прымусілі выстройвацца ў фігуру з імем Пуціна вучняў пачатковых класаў адной са школ у Растоўскай вобласці.
Таксама прымусілі такім чынам выстройвацца жыхароў, студэнтаў і школьнікаў акупаванай часткі Херсонскай вобласці (Новааляксееўка), Чувашыі (Цывільск), Прыморскага краю (Арцём), Самары і Маскоўскай вобласці (Талдам).
Дарэчы, у 2024 годзе Пуцін атрымаў найменшую колькасць віншаванняў ад замежных кіраўнікоў дзяржаў з пачатку вайны ва Украіне, піша выданне «Агентство» пасля аналізу паведамленняў прэс-службы Крамля.
Усяго з 72‑годдзем Пуціна павіншавалі восем замежных лідараў: прэзідэнт Нікарагуа Даніэль Артэга, прэзідэнт Туркменістана Сердар Бердымухамедаў, прэм'ер-міністр Арменіі Нікол Пашынян, прэзідэнт Турцыі Рэджэп Таіп Эрдаган, прэзідэнт Цэнтральна-Афрыканскай Рэспублікі Фастэн-Арканж Туадэра, прэзідэнт Казахстана Касым-Жамарт Такаеў, кароль Бахрэйна шэйх Хамад бен Іса Аль Халіфа і Аляксандр Лукашэнка.
З сусветных лідараў праз тэлефон Пуціну асабіста пазваніў толькі прэзідэнт Турцыі Рэджэп Таіп Эрдаган, астатнія абмежаваліся тэлеграмамі. Лукашэнка ж, як вядома, паляцеў сёння ў Маскву асабіста.
Каментары
А распавядзіце мне, шыхтавалася ў "72 гады ленінградзкаму карузьліку" сацыяльная група бюджэтнікі ці сацыяльная група прыватнікі, га??